Popular Bible Verses from 5 Mose 28

Share

Na sɛ motie AWURADE, mo Onyankopɔn, na modi mmara a mede rema mo ɛnnɛ yi so a, AWURADE, mo Onyankopɔn, bɛpagya mo asene aman a wɔwɔ ewiase nyinaa.

Sɛ motie AWURADE, mo Onyankopɔn a, mobɛnya saa nhyira yi nyinaa

Sɛ motie saa AWURADE, mo Onyankopɔn, mmara yi na modi so a, AWURADE bɛyɛ mo ti na ɛnyɛ nan, na moakorɔn.

AWURADE firi nʼahonya dodoɔ a ɛwɔ soro no mu bɛma osuo atotɔ wɔ ne berɛ mu, nam so ahyira mo nnwuma a moyɛ so. Mobɛfɛm aman pii nanso, mo deɛ, moremfɛm hwee mfiri wɔn nkyɛn.

Sɛ atamfoɔ to hyɛ mo so a, AWURADE bɛdi wɔn so. Wɔbɛfiri baabi ato ahyɛ mo so na wɔafa akwan nson so ahwete afiri mo anim.

Biribiara a mobɛyɛ no, AWURADE bɛhyira so na ɔde aburoo ahyɛ mo apata ma ma. AWURADE, mo Onyankopɔn, bɛhyira mo wɔ asase a ɔde rema mo no so.

Wɔbɛhyira mo wɔ baabiara a mobɛkɔ, mo fieba mu ne mo adifire mu.

Wɔbɛhyira mo wɔ mo nkuro ne mo ɔman mu.

Wɔde mma bebree ne nsase bereɛ bɛhyira mo. Wɔde anantwie ne nnwan a wɔn ase dɔre bɛhyira mo.

Sɛ modi AWURADE, mo Onyankopɔn, mmara no so na monante nʼakwan so a, Awurade bɛgyina mo sɛ ne nnipa kronkron sɛdeɛ ɔhyɛɛ mo bɔ sɛ ɔbɛyɛ no.

Wɔde nnuaba nkɛntɛn ma ma, ne mmɔre kodoɔ a burodo ahyɛ so ma bɛhyira mo.

AWURADE bɛma mo nneɛma pa ma aboro so ma—nyɛmmoa ne afudeɛ pii wɔ asase a ɔhyɛɛ mo agyanom bɔ sɛ ɔde bɛma wɔn no so.

Afei, ewiase aman nyinaa bɛhunu sɛ, moyɛ nnipa a AWURADE afa mo, na wɔbɛsuro mo.

Ɛnsɛ sɛ motwe mo ho firi mmara a mede rema mo ɛnnɛ yi biara ho sɛ morekɔdi anyame foforɔ akyi asom wɔn.

Na sɛ moantie AWURADE, mo Onyankopɔn, anni ne mmara nyinaa a mede rema mo ɛnnɛ no so a, saa nnome yi nyinaa bɛba abɛbunkam afa mo so.