Popular Bible Verses from ISAIA 33

Share

Lohiabada ese Iuda do ia hagoadaia. Ia ese nega ibounai iena bese taudia ia naria noho, bona aonega bona diba ia henidia. Idia edia kohu badana momokani, be edia gari, Lohiabada dekenai.

Lohiabada e, ai dekenai do oi bogahisihisi henia. Ai ese oi ai naria noho, mai abidadama danu. Dina ta ta ibounai, mani emu kara ai do oi hagoadaia, bona nega dikadia neganai ai do oi hamauria.

Badina Lohiabada be iseda Kota Biaguna, ia sibona be iseda King. Ia ese ita do ia biagua, bona ita do ia hamauria.

Do umui mauri diba, bema emui hereva bona emui kara be maoromaoro neganai. Emui goada do umui gaukaralaia kava lasi. Ogogami taudia do umui koia lasi, edia moni abia kava totona. Bona lalona veria moni do umui abia dae lasi. Ala-ala bona kara dika idia karaia gwauraia taudia danu do umui haboua lasi. Unai neganai do umui noho namonamo, mai mauri danu, bona mauri namona do umui abia, kohoro goadana ta dekenai umui noho hegeregerena. Umui emui aniani bona emui ranu danu be do idia hegeregere momokani.