Popular Bible Verses from ISAIA 11

Share

Lohiabada ena Lauma ese, ia dekenai do ia kamokau. bona inai bamona do ia hanamoa: Aonega bona laloa kehoa ena Lauma do ia henia. Sisiba namona henia dalana, bona siahu ena Lauma do ia henia, Diba maorona, bona Lohiabada gari henia kara, ena Lauma be do ia henia. Mai moale bada danu, ia ese Lohiabada ena ura do ia karaia.

Iese ena bese taudia, be au ena badina, idia utua diho gauna bamona. Inai badina dekena amo, herahera matamata do ia tubu, bona Iese ena ramu dekena amo, Rigi ta do ia tubu, King matamatana ta unai.

To ogogami taudia be mai maoromaoro danu, do ia kota henidia. bona manoka taudia idia hisihisi henia taudia, be ia ese do ia panisidia. Taunimanima edia kerere davana, be ia ese do ia gwauraia, bona ia oda neganai, kara dika taudia do idia mase.

Iena Basileia taudia be do ia gunalaia, mai maoromaoro bona momokani danu.

Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.

Uda sisia bona mamoe, be do idia noho hebou mai maino danu, bona taiga be nanigosi danu do idia hekure hebou. Boromakau natuna bona laiona natuna be do idia aniani hebou. bona taunimanima ena natuna maragina ta ese do ia hakaudia.

Unai dina dekenai, Iese ena Ramuna, King matamatana unai, be bese ibounai taudia ese do idia tahua. Ia be do ia gini, bese ibounai edia pepe, bona bese idauidau taudia ese ia dekenai do idia haboua. Iena noho gabuna be do mai hairaina momokani.