Popular Bible Verses from Matthew 24

Share

ayiwāk kita-ati-maci-tōtamwak ayisiyiniwak piko itē, ēkosi mihcēt kita-pōni-sākihitowak. māka awiyak misakāmē maskawikāpawici ēwako kita-pimācihāw.

kihci-kīsikowi-tipēyihcikēwin ohci miywācimowin ōma kita-wīhtamonāniwan, misiwē askīhk kita-pēhtamohk, ēkosi kita-pōni-askīwan.

kika-pēhtēnāwāw kisiwāk ē‑matwē-nōtinitohk ēkwa mīna wāhyaw; māka ēkāya mikoskātēyihtamok. ohcitaw ēkosi kita-ispayik, māka namōya sēmāk ē‑wī-pōni-askīwahk.

pāh‑pītos ohci ē‑itahtōskānēsicik ayisiyiniwak kita-nōtinitowak; ayisiyiniwak kā‑ohcīcik pāh‑pītos okimāwi-tipēyihcikēwina kita-nōtinitowak. mihcētwayak itē kita-nipahāhkatosowak ayisiyiniwak ēkwa kita-nanamahcipayiw askiy pāh‑pītos itē. kahkiyaw ōhi kā‑wī-ispayiki tāpiskōc anihi nīkān wīsakāhpinēwina kā‑nōkohāwasohk.

kihci-kīsik ēkwa askiy kita-kisipipayiwa māka nikiskinohamākēwin namōya wīhkāc kita-pōnipayiw.

mihcēt ayisiyiniwak kita-takohtēwak ē‑āpacihtācik niwīhowin, ēkwa ōmisi kita-itwēwak, ‘niya ōma onawasōnākan.’ ēkwa mihcēt kita-cīsimēwak.

“kika-otinikawināwāw ēkwa kika-kakwātakihikawināwāw ēkwa kika-nipahikawināwāw. kahkiyaw ē‑tahtoskānēsicik ayisiyiniwak kika-pakwātikowāwak niya ohci. mihcēt ēkospīhk kita-pakitinamwak otāpwēhtamowiniwāw. kita-misihitowak mīna kita-pakwātitowak. ēkwa ta‑mihcētiwak āhkītāp okiskiwēhikēwak ēkospīhk, ēkwa kita-wayēsimēwak mihcēt ayisiyiniwa.

naskwēwasimēw Jesus ē‑itāt, “aswēyihtamok ēkāya awiyak kika-cīsihikowāw.

ēkosi kīstawāw piko āsay kita-kī-wawēyīyēk, wiya ēkāya ihtatēyimāyēko ē‑wī-takosihk ayisiyinīwikosisān.

ēkosi aswēyihtamok, namōya kikiskēyihtēnāwāw ispīhk anima kīsikāw kā‑tipēyimikoyēk ka‑takosihk.

“māka namōya awiyak kiskēyihtam anima kīsikāw mīna tānitahto tipahikan ēwako ōma kita-ispayik, namōya ahpō okīsikowak ahpō okosisimāw kiskēyihtamwak, wiya piko ohtāwīmāw kiskēyihtam.

ātiht ayisiyiniwak kita-itwēwak ‘niya ōma onawasōnākan’ ahpō kita-itwēwak ‘niya ōma okiskiwēhikēw.’ kita-mamāhtāwisiwak mīna kita-māmaskātikwak ayisiyiniwa ēkota ohci kita-wayēsimācik ahpō kisē-manitowa kā‑kī-nawasōnāt ayisiyiniwa, tāpiskōc kita-kī-kaskihtācik.

ispīhk ayisiyinīwikosisān takosihki kita-ihkin tāpiskōc ispīhk kā‑kī-pimātisit Noah. ēkospīhk pāmwayēs iskipēk askiy, ayisiyiniwak kī‑mīcisowak, kī‑minihkwēwak ēkwa kī‑wīkihtowak isko iyikohk Noah kā‑pōsit nāpihkwānihk. ēkwa namōya ohci-kiskēyihtamwak ē‑wī-ihkiniyik isko iyikohk ē‑wēpahikocik iskipēwin. ēkosi pēyakwan kita-ispayiw ayisiyinīwikosisān takosihki.