Popular Bible Verses from 1 Piyɛri 1

Share

Tantue be Ala ye, wo mɔ Marige Isa Ala la mɔgɔ masubɛreŋɛ Baaba Ala. A bata kinikini wo mɔ ma koola, han a ka a ma wo mɔ ni tasɔtɔ a nama la Isa la malawule sabu la. A to ka Isa lawuli faga ma, wolo ka a ma yige be wo mɔ ma, yige min te ban. A ka a ma wo mɔ ni tasɔtɔ a nama la, alako wo mɔ ni kɛɛ saniyandeŋɛ sɔtɔ min te ban, a te tiɲa. Wo kɛɛ le be mandiren wo ye arijanna butɔ.

Wo butɔ, wo ni sɛɛwa, hali a be lagiriren wo ye tɔɔrɛ mɔɔle bɛ ni wo juse makasa kɛ wagatindeŋɛ kɔtɔ. Wo ko bɛlɛŋɛnu si a ma le a ni lɔn ma, wo la dɛnkɛnɛya bata sabati a ɲinma la. A be mulunden sanuɛ le la min be sala ta tɔ a boee ni bɔɔ. Hali sanuɛ si tiɲa le, kɔnɔ wo la dɛnkɛnɛya kan sɔdula kolo wo ko. Isa Ala la mɔgɔ masubɛreŋɛ tini a yɛtɛ labɔɔ lun min na, wo si mamatɔgɛ, kunnawule nun biliya sɔtɔ wo tuma.

Wo ni saniyan wo la tagamanɲa bɛ tɔ, iko Ala min be wo keleren, a be saniyanden ki min na. Bayi a be sɛbɛren kitabue tɔ: «Wo ni saniyan, bayi nde be saniyanden.»

Wo ni to iko deŋɛ min be tola a baaba sagoe tɔ. Wo butɔ, wo kana sɔ wo hanige koroŋɛnu kɔma iko wo be a mala ki min na nun yannun wo be Isa lɔnna wagate min tɔ nun.

Wolo mu, fɔ wo ni wo tabɛn, wo ni wo hakkile to koe ma wo be nala min mala: wo ni wo hakkile to wo yɛtɛ ma, wo ni wo yili bɛ sɔ Ala la kɔɔre ma, a be min diila wo ma Ala la mɔgɔ masubɛreŋɛ Isa na luŋɛ.

Bayi a be sɛbɛren kitabue tɔ: «Adamadeŋɛ bɛ be misaliren kifeŋɛ le la. ⸂Mɔgɛ⸃ la nɔɔra be toren de iko kifeŋɛ feere. Kifeŋɛ si fasaya le, a feere ni boe. Kɔnɔ Marige la kuma kan be mɛla le abada.» Awa, kɛ kuma be tabɛnden kibaru ɲinma le ma min bata fɔ wo ye.