Popular Bible Verses from Romans 6

Share

Wesh nipuwinihch ituhtahiikuu awen machihtwaawiniyuu. Ekw an awen kaa wiichewaat Jesus Christ Chitipeyihchikeminuuh Chishemanituuh sehchei miikuu kaachiche pimaatisiiwiniyuu.

Ekaawii ekw chika uhchi tipeyimikunaawaau machaatisiiwin wesh taapaa ekw mikw wiishuwewin e nanihiihtamekw chika uhchi naniheyihtamihaawaau Chishemanituu. Wesh Chishemanituu uweyuch shaweyihchichewinihch ekut wehchi pimaachihiitaakw.

Ekun maak wehch ishinaakuhch kaa siikahaahtaakuyihkw mwehch kaye chiyaanuu e chii nahiihkaakuyihkw kaa nahiihkuwaakanuut kaye kaa nipahaakanuut chiyaanuu kaye chichii nipahiikunaanuu. Uu maak wehchii ishinaakuhch eukw mitun chechii uscheyihtaakuhch taan e ishi pimaatisiihkw mwehch kaa ishpish tekash uscheyihtaakuniyich Christ upimaatisiiwin kaa wanishkaanikut Uhtaawimaau uchisteyihtaakusuu suuhkaatisiiwiniihch uhchi.

Ekaawii kaye mitun pachishtinamukw chiiyuuwaauh machihtwaawinihch chechii ishi aapatahkwaau. Chishemanituu teyakuch pachishteyimitisuustawaahkw. Ekw maak che ishinaakusiyekw mwehch awenichii e chii nipitwaau kaau maak e pimaatisiitwaau. Tekash pachishtinaahkw Chishemanituu chechii tipeyihtahk chipimaatisiiwinawaauh. Ekw maak chechii aapachihiitaakw chechii miyutuutamuwekw.

Wesh chichischeyihtenaanuu an weskach chititaatisiwinuu e chii chiistaaskuhtaakanuuhch Jesus kaa chiistaaskuhwaakanuut ashiteyaahtikuhch. Aniyuu kaa chiistaaskuhwaakanuut ekut kaa nishuunaatisiimakahch taan kaa ishi tipeyimikuyihkw weskach chititaatisiiwinuuh ekw maak namui mitun chika chii tipeyimikunaanuu ekw machaatisiiwin.

Mwehch awenichii e nipitwaau ekaa tipeyimikutwaau machaatisiiwiniyuu ekun chipaa ishi kanawaapamisunaawaau. Chipimaatisiinaawaau ekw chechii naheyihtamihekw Chishemanituu e wiicheumekw Jesus Christ.

Itwet aahch awen ekush yaapach machituutahtaau etituu chechii nuukuhtwaatahkw e ishpish muush weyuuch shaweyimaat Chishemanituu aweyuuh. Mwaau nipaa ishi nishkweushihaau an awen uyuu itwet. Namui chika chii ishinaakun uu. Namui mechim chipaa uhchi ishi maamituneyihtam awen. Chipaa ishi kanawaapamisunaanuu mwehch e chii nipistamuhkw taan kaa ishi tipeyimikuyihkw machihtwaawin. Namui ekw machihtwaawinihch chipaa uhchi ishi pimaatisiinaanuu.

Chinituweyimitinaawaau uu chechii chischisiyekw. Pachishteyimitisuustawekwe awen chechii uhchi tekash nanihiihtuwekw mwehch aapachihaakan e ishinaakusit e nanihiihtuwaat uchimaamh, kiipaa che utaapachihaakanitutaataakw an awen kaa wiyeyihtamekw chechii nanihiihtawekw. Mwehch maak e ishinaakusit aapachihaakan mwehch e maahchikwaapihkaasut chechii nanihiihtuwaat uchimaam ekun mwehch e ishinaakusiyekw kaye chiyawaau. Maak kaa pachishteyimitisuustamuwekwe an taan e ishi ihtakuhch e wii machituutamekw maak Chishemanituu kaa pachishteyimitisuustawekwe. Chiishpin maak kaa pachishteyimitisuustamuwekwe an taan e ishi ihtakuhch e wii machituutamekw kiipaa ekut che uhchipayihch kaachiche che nipiyekw. Chiishpin maak wiya Chishemanituu kaa pachishteyimitisuustawekwe ekut che uhchipayihch chechii kuiskutaatisiyekw.

Ninanaaskumaau Chishemanituu chiyawaau peyakwaau kaa ishinaakusiyekw e utaapachihaakanitutaakuyekw machihtwaawin, e chii utihchipayihch taanit tekash kaa iteyihtamihiikuyekw chechii nanihiihtamekw miyu chiskutamaachewin iskutak e ati waawiihtamaakuyekw. Chichii wiihkuchihiikunaawaau machihtwaawinihch uhchi ekw maak kuiskutaatisiiwin kaa ati tipeyimikuyekw.