Popular Bible Verses from Mark 6

Share

Naashch maak chii mihchetiyuu aweyuu e takushiniyich e pechi nituwaapamikutwaau ekw namui mechim uhchi ishpishiyuuch chechii miichisutwaau. Ekw Jesus kaa itaat aniyuu uchischinuhamuwaakanh, “Aashtamukw mikw chiyawaau anite ekaa ihtaanuuhch, che aashteyeskusiyekw.”

Ekw Jesus kaa itaat, “An awen kaa uchischiwehiichesuut chisteyimaakanuu aihch ihtaawinihch ekw anit tipiiwe utaschiihch e ihtaat namui aapateyimaakanuu. Namui mechim chisteyimikuu uwaahkumaakan kaye aniyuuh anit e peyakuteusiit kaa ihtaayich.”

Iskutak Jesus kepaat aniyuu utiyuu chii waapameu aniyuu iinuuh e mihchetiyich. Naashch maak chii muushihtaau e chistimaacheyimaat mwehch maanishchaanishach ekaa ayaawaatwaau maanishchaanishuiinuu che naanaakachihiikutwaau e ishinaakusitwaau. Ekw kaa chiskutamuwaat mihchetu chekwaayuuh.

Aniyuu maak ekaa uhchi taapwehtamiyich namui uhchi ihtuutam maamishkaach chekwaayuuh anit, mikw pasch aniyuuh kaa aahkusiitwaauh chii saamineu, chii miinuwaachiheu maak. Chii maamishkaateyimeu maak aniyuu e ishpish ekaa taapweyimikut. Chii achineskam maak aniyuuh ihtaawinisha e papaa chiskutamaachet.

Ekw Jesus kaa utinaat aniyuu niyaayin aaihkunaau kaye aniyuu niishu namesa, ishpimihch kaa ishi tastasaapit e nanaaskumaat Chishemanituu. Chii pahpihkwepiteu misiwe aniyuuh aaihkunaauh, ekw kaa miyaat uchischinuhamuwaakan chechii maatinaweyich. Kaye aniyuuh niishu namesa chii maatinamuweu chechii maatinamuwaayich misiwe aweyuuh anit kaa ihtaayich chechii miichisuyich. Misiwe maak awen chii miichisuu kaye chii tepimiichisuu. Ekw anichii chischinuhamuwaakanich kaa maamuushtinahkwaau ishkushtawaaniyuu. Niishushaap maak utapiiwath chii saakashchinihtaauch aniyuu kaa ishpish iskupuwaakanuyich aaihkunaauh kaye namesa.