Popular Bible Verses from Tyai Á̱zanson 12

Share

A̱wot á̱niet khwi Yesu ba si̱ ya Sha̱tan mi̱ zwang ji, mat chet a̱sok Fi̱ng A̱nfwuk hu ma̱ng sheda mba hu tazwa a̱lyiat A̱gwaza. Mat ba̱ chat swuan mba ji shansham bah; a̱wot da̱ mba ba̱ fwuong a̱wun a̱khwu bah.

A̱wot n si̱ kin fa̱k a̱gba̱ndang a̱nwuat neet Ma A̱gwaza tswazwa nyia̱, “Ma̱ninika, san sang sangba̱p hu bai, ma̱ng chet, ma̱ng tyok A̱gwaza nzi̱t hu, ma̱ng tyok Kristi nggu hu, a̱tyu nang gu kup gu tyok a̱ni! Mat a̱tyu a̱ tyam á̱na̱nyiuk nzi̱t ba a̱ni, á̱ ta nggu a̱byin mi̱ swanta hu; nggu wa tyam mba a̱zaghyi A̱gwaza nzi̱t wu, a̱ta̱mam ma̱ng a̱tyetuk!

A̱gba̱ndang a̱ka̱tuk nzwuo a̱ byia̱ nfeap na a̱ni, a̱ yet a̱khwukhwop nzwak gbangbang a̱wa, nang á̱ ngyei A̱ta̱nyeang, á̱ bu ngyei nggu, “Sha̱tan”; a̱tyu a̱ laai a̱mgba̱m á̱niet swanta ba a̱ni. Á̱ si̱ yuut gu ma̱ng a̱ka̱tuk a̱yaata̱m tswá nggu ba neet Ma A̱gwaza tswazwa á̱ ta a̱byin mi̱ swanta hu.

Mat a̱nia, nyin Ma A̱gwaza tswazwa ka, nyi gwai! Ma̱ng a̱mgba̱m nyin á̱niet nyi shya̱ a̱ja a̱ni, nyi gwai! A̱wot nyin, nyi shya̱ a̱byin ka ma̱ng kyai a̱sa̱khwot hu a̱ni, ku swan nyin! Mat A̱ta̱nyeang chyok da̱ nyin ma̱ng a̱gba̱ndang mwai lyen ma̱ng a̱lyia̱ ya, mat ka̱ lyen nang jen ka ji mbwat chunchwiit.”

Zwang si̱ doot Ma A̱gwaza tswazwa. Mikailu, (a̱kwak a̱son a̱yaata̱m tswá A̱gwaza) ma̱ng á̱kum a̱yaata̱m tswá nggu ba si̱ kwan zwang ma̱ng a̱gba̱ndang a̱ka̱tuk nzwuo a̱ byia̱ nfeap na a̱ni ma̱ng a̱ka̱tuk ntswá nggu ba.

A̱wot a̱gba̱ndang a̱ka̱tuk nzwuo a̱ byia̱ nfeap na a̱ni, si̱ fa̱k a̱lyia̱ ya ma̱ng a̱byii̱k wu. A̱ si̱ doot zwang ma̱ng á̱kum mman a̱byii̱k ka. Ni̱nia yet a̱mgba̱m á̱niet ba̱ khwi á̱lyiat A̱gwaza na, ba̱ bu yong di̱ nwuak sheda da̱ a̱lyiat Yesu a̱ni.

A̱jawa n si̱ bu ndi a̱gba̱ndang kyang a̱ga̱de a̱ghyang Ma A̱gwaza tswazwa! N si̱ ndi a̱byii̱k a̱ghyang nang mam hwa kup guu. A̱wot zwat si̱ bu shya̱ a̱tafa a̱ti̱tak nggu ka, ma̱ng bung tyok ji̱ byia̱ á̱ta̱ngwat swak ma̱ feang a̱ni, tazwa a̱pyia̱ nggu ka! A̱byii̱k wu shya̱ ma̱ng a̱fa, a̱wot a̱ si̱ twei ba̱t mat fwuong a̱khwu gu swuo di̱n twei ma̱ng byin a̱ni.

A̱byii̱k wu si̱ byin nggwon a̱sam, ka̱ na nyia̱ tyok a̱mgba̱m bibyin swanta hu ma̱ng shan ntswam a̱ni. A̱wot á̱ si̱ ta̱wap nggwon a̱byii̱k ka da̱ a̱vwuo a̱gba̱ndang a̱ka̱tuk nzwuo a̱ byia̱ nfeap a̱ni, á̱ nat ndyo da̱ a̱vwuo A̱gwaza ma̱ng a̱gba̱ndang chuk Tyok A̱gwaza wu. A̱byii̱k wu si̱ tyong a̱ nwuo mi̱ tswa a̱yit; a̱vwuo nang A̱gwaza jhyi a̱ sak a̱ nchok gu a̱ni, ba̱ng si̱ nat mmam chyikwop jhyung ma̱ng chyi sweang mi̱ nswak a̱taa (1260).

A̱wot n si̱ bu kin di kyang a̱ga̱de ghyang ku team Ma A̱gwaza tswazwa! Ku yet a̱gba̱ndang a̱shong a̱ka̱tuk nzwuo a̱ byia̱ nfeap a̱ni! Ku si̱ byia̱ pyipyia̱ a̱natat ma̱ng a̱ti̱tam swak, ma̱ng bung tyok tazwa kuzang a̱pyia̱. A̱wot li̱m a̱ka̱tuk nzwuo hu si̱ khwat sot jhyung mami susot tsat á̱ta̱ngwat na̱ shya̱ mi̱ kyai tswazwa hu a̱ni, a̱ ta a̱byin mi̱ swanta hu. A̱ si̱si̱ yong a̱zaghyi a̱byii̱k a̱wa a̱ twei ma̱ng byin hu a̱ni, a̱ fwuong ka̱ a̱byii̱k wu byin, gu ya nggwon ka!

A̱wot á̱ si̱ nwuak a̱byii̱k wu nfeap nfeang nang si̱ a̱gba̱ndang a̱gwong a̱da a̱ni; gu ka fi̱p a̱ nat mi̱ ntswa a̱yit da̱ a̱vwuo nang á̱ jhyi á̱ sak gu ndyo a̱ni. A̱ja wa á̱ na mbeang guu á̱ bu chok gu á̱ tyong a̱gba̱ndang a̱ka̱tuk nzwuo a̱wa, si̱ nat a̱lyia̱ a̱tat ma̱ng á̱kum. A̱jawa nang a̱gba̱ndang a̱ka̱tuk nzwuo wu a̱ byia̱ nfeap na a̱ni, si̱ kwan a̱ ghwut ma̱ng a̱sa̱khwot a̱ri̱giwa a̱bwonu nggu ka, na̱ ka kup a̱byii̱k wu a̱ ta̱lyip a̱ khwu. A̱wot a̱byin si̱ beang a̱byii̱k wu, ka̱ si̱ khwuk. Ka̱ si̱ nwuan a̱sa̱khwot a̱ghyui na na̱ ghwut a̱bwonu a̱gba̱ndang a̱ka̱tuk nzwuo a̱ byia̱ nfeap na a̱ni.