Popular Bible Verses from 1 A̱korontiyawa 12

Share

Á̱ nang konyan ma̱ nzi̱t kuzang ntangka̱i za̱náng chet A̱za̱za̱rak Ntswa, da̱nian zi̱ ka mbeang á̱ghyang.

Ma a̱nia wa, a̱mgba̱m nyin sot á̱niet khwi ji, nyi yet vam Kristi hwa. A̱wot konyan ma̱ nyin yet kap nyiung hwa mi̱ vam nggu hu.

Ki̱ kap nyiung swuo a̱bung, a̱mgba̱m á̱kum nkap ka na mun á̱ swuo a̱bung ka dundung ma̱ng a̱nhu. Ma a̱nia wa, ka̱ á̱ ma nwuak kap nyiung shi, a̱mgba̱m á̱kum nkap ka na gwai dundung ma̱ng a̱nhu.

A̱ghyang a̱niet, A̱za̱za̱rak Ntswa wu nang gu chet nang gu na nshei a̱lyiat A̱gwaza na ma̱ng a̱tsatsak mumwang nang á̱ tyai nggu ndyo a̱ni. A̱ghyang a̱niet mameang, A̱za̱za̱rak Ntswa wu si̱ nang nggu chet nang gu na ndyiat nang a̱tyu lyen a̱lyiat A̱gwaza nang A̱za̱za̱rak Ntswa wu tyai nggu ndyo a̱ni. A̱ghyang a̱niet, A̱za̱za̱rak Ntswa wu si̱ nang nggu chet nang gu na nwuak fwuo gba̱mgbam, A̱gwaza a̱ tyai a̱tsatsak nchet nggu wu da̱ a̱nggu a̱tyu a̱ nwuak fwuo hu a̱ni. A̱ghyang a̱niet meang, A̱za̱za̱rak Ntswa wu si̱ nang nggu chet kuzang jen a̱ choot kuzang tangka̱i nzwan. A̱ghyang a̱niet, A̱za̱za̱rak Ntswa wu si̱ nang nggu chet kuzang jen gu ni̱ nnyia̱ nta̱m a̱ga̱de njhyang ma̱ a̱di̱di̱t. A̱wot a̱ghyang a̱niet meang, á̱ si̱ nang nggu chet shei a̱lyiat A̱gwaza nang A̱za̱za̱rak Ntswa wu ni̱ tyai gu kpa̱sai gu shei susot á̱niet khwi ji a̱ni. A̱ghyang a̱niet byia̱ chet khap A̱za̱za̱rak Ntswa ma̱ng a̱ka̱tuk ntswa a̱ni. Ma a̱nia wa, a̱ghyang a̱niet á̱ nang nggu chet a̱ lyiat di̱ lilyem A̱za̱za̱rak Ntswa ma̱ a̱di̱di̱t nang á̱ghyang á̱niet chyi a̱ni. A̱wot a̱ghyang a̱niet, á̱ si̱ nang nggu chet bwan a̱lyiat neet di̱ lilyem A̱za̱za̱rak Ntswa nat ndyo di̱ swáng a̱lyiat lilyem susot á̱niet khwi.

A̱mgba̱m za̱náng chet jini A̱za̱za̱rak Ntswa A̱gwaza wa ma̱nyin gu ka̱u njii. Nggu wa ma̱nyin gu bu khai za̱náng chet nang gu na nang konyan a̱ni.

Si̱ huni na tyia̱ nkap na na̱ mun á̱pyia̱ mi̱ vam hu, mat a̱mgba̱m nkap na na̱ ka beang jhyang.

Za̱náng chet A̱za̱za̱rak Ntswa nshya̱ ma̱ a̱di̱di̱t ji̱ vwuon a̱ni. A̱wot A̱za̱za̱rak Ntswa a̱nyiung wa ka̱u nji a̱mgba̱m. Nta̱m A̱gwaza nshya̱ ma̱ a̱di̱di̱t na̱ vwuon a̱ni. A̱wot A̱gwaza a̱nyiung wa nang zi̱ nyia̱ nggu kuzang tangka̱i nta̱m. A̱gwaza nyia̱ nta̱m di̱ nvak ma̱ a̱di̱di̱t. A̱wot ma̱ A̱gwaza a̱nyiung wa nyia̱ kuzang tangka̱i nta̱m mi̱ konyan ma̱ nzi̱t.

A̱wot A̱gwaza si̱ khai á̱ghyang á̱niet mi̱ sot á̱niet khwi ji: a̱nyiung, a̱yaata̱m Yesu; a̱feang, a̱yaata̱m a̱kwonu A̱gwaza; a̱tat, á̱niet tyiet; a̱wot ma̱ng á̱niet nyia̱ nkyang a̱ga̱de, ma̱ng á̱niet ba̱ byia̱ za̱náng chet choot á̱niet nzwán a̱ni; ma̱ng á̱niet ba̱ byia̱ za̱náng chet beang á̱ghyang a̱ni; ma̱ng á̱niet byia̱ za̱náng chet yet a̱yaakwak a̱son a̱ni; ma̱ng á̱niet ba̱ lyiat di̱ lilyem A̱za̱za̱rak Ntswa nang á̱ chyi a̱ni.

A̱tsak a̱lyiat, vam hu byia̱ nkap ma̱ a̱di̱di̱t, ku yet kap nyiung hwa bah.

Mami a̱tsak a̱lyiat, nkap na nang á̱ nwuan na sang chet, á̱ si̱ bu kyiak na nang kyang a̱ni bah, na̱ yet kyang chat hwa mi̱ vam hu.

Ka̱ a̱mgba̱m vam hu wa yet tswa a̱li ja, si̱ yihwa zi̱ na nfwuong a̱vwuo na? Ma a̱nia wa, ka a̱mgba̱m vam hu wa yet fufwuo hwa, si̱ yihwa zi̱ na nfwuong swam nkyang hu? Mat a̱nia, nvam nzi̱t na byia̱ nkap ma̱ a̱di̱di̱t. A̱wot A̱gwaza si̱ tyia̱ kuzang kap di̱ tyan nang nggu n chat hu a̱ni. Ka̱ a̱mgba̱m vam hu wa yet kap nyiung hwa, si̱ ku li kang!