Popular Bible Verses from Revalesoni 14

Share

Meke totoso asa si avosia rau si keke mamalaiṉi mae guana pa Maṉauru, sapu zama guahe: “Mu kuberia sapu guahe: Tamanae tugo saripu koa keke koasa Baṉara, pu mate kamahire meke gua tugo saripu kote mate vugo repere! Uve! Ura, kote magogoso koari na dia tinavete mamatadi si arini, meke kote piai tugo Tamasa si arini koari na dia tinavete leadi,” gua sa Maqomaqo Hope.

Ke hire tugo sari na totoso pude turu va nabu sari na tie te Tamasa, saripu va tabei sari Nana tinarae, meke soto va nabu pa dia rinaṉeraṉe koe Zisu.

Meke zama va ululae si asa, “Mi pamaṉa nia na vahesia sa Tamasa! Ura ele kamo sa totoso varipitui tanisa. Mi vahesia si Asa pu tavetena sa Maṉauru, sa pepeso, sa lamana, meke sari na bukahadi ri na kolo!” gua si asa.

Meke luli la gana koari kara sa mateana vina ṉeta, meke velavela va ululae guahe: “Arini pu vahesia sa kurukuru kaleana, meke sa beku sapu ta tavete luli pa kinehana sa, meke vekoa pa raedi, babe pa limadi sa vina gilagila tanisa kurukuru, si kaqu va napo ni Tamasa sa doduruna sa ṉiniraṉira tanisa Nana kapa tinaṉaziri nomana hola. Meke kote tava sigiti hola pa nika meke pa kolo nai lerana si arini, pa kenudi ri na mateana hopedi te Tamasa meke sa Lami. Meke sa tuṉahana sa nika vasina koa ta sigiti si arini, si vura sage ninae rane ka rane. Meke loke ari makudona rane na boṉi sa tinasigiti tadirini pu vahesia sa kurukuru kaleana meke sa beku, sapu sa kinehana sa. Gua tugo asa sa tinasigiti tadirini pu ele vagia sa vina gilagilana sa pozana sa,” gua.

Meke totoso doṉo la si rau si dogoria rau sa Lami sapu korapa turu Nana pa toqere Zaione  d . Meke turu turaṉae dia koa Sa sari ka keke gogoto made ṉavulu made tina tinoni. Meke ta kubere pa raedi sa pozana Sa, meke sa pozana sa Tamana.

Meke beto asa si dogoria rau si keke mateana sapu tapuru va ululu sage pa galegalearane, sapu palekena sa Inavoso Leana sapu koa ninae rane ka rane, pude tozi vura nia koari na tinoni pa ninae butubutu, na vinekala, meke na popoa.

Meke luli mae gana pule si keke mateana vina rua, meke zama: “Ele huara! Ele ta huara va inete sa popoa Babiloni, sa ṉati vasileana lavata. Sina ele ta turaṉa va sea pa nana hahanana maqota sari na tie koari doduru butubutu, guana va viviri ni vaeni variva pekipekina sa si arini,” gua.