Popular Bible Verses from Aisea 9

Share

Ura, koa gita si podo si keke koburu, keke koburu koreo si ta poni koa gita! Meke sa qinavuna si kote koa pa avarana Sa, meke kaqu ta pozae, Tie Varitokae Valeana pa Binalabala, Tamasa Heheda, Tamada Koa Hola, Koburu Tavia tana Binule.

Saripu ene pa hinuporo si dogoria si keke kalalasa nomana; sarini pa popoa hupohuporona vasina tata sa minate si pelara vura i na kalalasa.

Sa tinoqolona sa Nana qinavuna meke sa Nana binule si loke kokoina. Kaqu koa baṉara si Asa pa habohabotuana baṉara te Devita meke koasa nana binaṉara, kaqu kuria Sa meke zuka ia Sa pa ṉinoṉo meke tinoṉoto podalae pa totoso asa meke kamoa na kamoa. Sa hiniva ṉiṉirana te Zihova Tadi na Qeto Minate kote va gorevura ia si asa.

Sari buti tadi na varane sapu ene lani rini pa vinaripera, meke sari doduru dia poko sapu tale eharadi si kaqu ta sulu palae, kaqu ta sutuṉu la pa nika.

ba sa totoso huporo meke talotaṉa si lopu kaqu koa hola. Pukerane si va kurekure i Tamasa sari butubutu Zeboloni meke Napitalai, ba koari na rane vugo repere si kote va lavatia Sa sa popoa Qaleli tadi na tie Zenitailo  d . Sa popoa sapu koa ia sa siraṉa mae gua koasa kolo Meditareniani karovo la pa kali Ovuku Zodani.

Agoi va noma ia sa butubutu Izireli meke hoda ia Agoi sa dia qinetuqetu; qetuqetu si arini pa Kenumu qetu gua ari tie totoso pakepakete pa inuma, qetu gua ari na varane totoso vari hia ni ri sari vinagi pa mudi vinaripera.

Gua sapu tavetia Goi koasa totoso va kilasia Goi sa qeto minate tadi pa Midiani, si huara pania Goi sa ioki  d sapu ta mamata nia arini, sa huda sapu pilivarata pa avaradi, meke sa kolu sekesekeana tanisa tie ṉoṉovala.