Popular Bible Verses from Aisea 51

Share

Zama se Zihova, “Arau, uve Arau tugo si Asa pu va manoto gamu. Esei si gamu ke matagutu nia gamu sa tie, sa tuna na tie, sapu kote mate gua mo na duduli?

Arau ele vekoa sa Qua zinama pa ṉuzumia, meke nobi gamu Rau koasa maqomaqona sa Limaqu. Arau veko valeania pa nana vasina sa maṉauru, meke va sokirae ia sa popoa pepeso, meke zama koa rina tie pa Zaione, ‘Gamu sari na Qua tinoni,’ gua.”

Mi avoso Au, gamu pu tumae nia sa si toṉoto, gamu na tie pu tagoa sa Qua tinarae pa bulomia: Mi lopu matagutu nia sa ṉinovaṉovala tadi tie babe holoqoru ni sari dia zinama kaleadi.

Arau Zihova kote va manotia sa vasileana Zaione, meke kote tataru ni Rau sari doduru nana vetu ta huaradi; sari qega pa popoa Zaione si kote iliri Rau pude guana inuma pa Idini, sari pepeso kaleanadi pa korapana si kote guana inuma te Zihova. Na qinetuqetu si kote ta dogoro vasina, na kinera zama leana meke na vinahesi si kote ta avoso vasina.

Sarini pu ta holu vagi pule koe Zihova si kote kekere pule. Kote kerakeradi meke nuquru la pa Zaione; sa qinetu loke vina betona si kote toropae nia rini pa batudia. Na kinomolo na qinetu si kote koa eko mo koa rini, meke sa tinalotaṉa na siniṉo mamata si kote taloa koa rini.