Popular Bible Verses from Aisea 49

Share

Zama vura se Zihova, “Vegua boka muliṉi nia sa barikaleqe sa tuna soti meke lopu tataru nia sa sa koburu sapu podo sotia sa? Gina kote boka muliṉi nia sa, ba Arau lopu kaqu muliṉini gamu Rau!

Doṉo la, Arau ele kuberia pozamu koari na ola Limaqu, sari goba pa vari likohaemu si korapa balabala i Rau doduru totoso.

Ba hiera gua si zama nia e Zihova: “Uve, sari na boso si kote ta vagi pule koari na varane, meke sari na vinagi pa vinaripera si kote ta saputu vagi koari na qeto minate; Arau kote razai sarini pu raza igo si goi, meke sari mua koburu si kote harupi Rau.

Kamahire si zama se Zihova: ‘Na tiṉitoṉa hitekena mo sapu pude Agoi si na Qua nabulu pude va ṉiṉira pulei sari na butubutu te Zekopi meke pude turaṉa pule mae i sari na tie Izireli saripu koa holadi. Ba kote tavetavete Nigo tugo Rau pude na kalalasa koari na tie Zenitailo, pude agoi boka paleke la nia sa Qua hinarupu koari na tie pa vina betona sa popoa pepeso.’

Agoi na maṉauru, mu kukili qetuqetu; agoi na popoa pepeso, mu koa qetu; gamu na toqere, mi poraka vura pa kinera! Ura e Zihova si korapa va manoti sari Nana tinoni meke kote tataru ni Sa sari Nana tie pu korapa koa pa tinasigiti.