Popular Bible Verses from Mathew 24

Share

Chule chonset puncheh cheh jeh-a, mi tamtah ngailutna-a lhadai dingu ahi. Ahinla akhon ni geija thoh lhumkeija pangdetpa bou chu huhhing-a umding ahi.

Chule namtin jouse hetsahna dinga hiche gamsung thupha hi vannoi leiset pumpi-a kihil lhang ding ahi; chutahle kichai dingbou ahi.

Chule nanghon gal kisatle kidou thuthang najah dingu ahi; chingtheijun, lungdong hih-un; ijeh-inem itile hicheng chu hungsoh tei ding ahi; ahivangin achaina hiloulai ding ahi.

Ijeh-inem itile vai khatle vai khat, gam khat le gam khat hung kidouvintin, mun chom choma kel lhantin, nat set lengin tin, ling kihot ding ahi. Hitiho jouse chu naosonat kipan ahi.

Vanle lei mang ding ahin; keima thu vang mang lou ding ahi.

Ijeh-inem itile mi tamtah keima minin hunguntin, Keima Christa kahi tiuvintin, mi tamtah alheplhah dingu ahi.

Hiche phat teng chule genthei hesoh thoh dinga mihon nangho nahinpehdoh dingu ahi; chule keima min jala nangho namtin jouse hotna nahung umdingu ahi. Hiteng chule mi tamtah lunglha ding ahi, chule khatle khat kipedoh tontin, chule khat le khat kihoto ding ahi. Chule themgao lhem tamtah sohdoh-a, mi tamtah alheplhah dingu ahi.

Chuin Jesu'n adonbutnin, ajah uva hitin aseije, Koiman nangho nalheplhah louna dingun kichih theijun

Hijeh chun nangho phasademin umun; ijeh-inem itile nagel lou pettah-ule Mihem Chapa chu hung ding ahi.

Hijeh chun kiging jingin umum; ijeh-inem itile na-Pakaiyu ipi nikho le nidana ahung ding nanghon nahepouve.

Ahivangin ka Pa changseh tilou van'a vantilte jong, koimachan anikho le anidan tah chu ahepoi.

Ijeh-inem itile Christa lhemho le themgao lhemho hung sohdoh untin, melchihna loupi tahtah le mu kidang ahinvetsah dingu ahi; ahitheile lhenchomte tah jeng jong ahinlheplhah dingu ahi.

Ahinla Noah nikho tobang chu Mihem Chapa hungkit nijong hiding ahi. Ijeh-inem itile twisanglet masangin, Noah kong'a alut ni geijin, mihon aneuvin adonun, akichengun, akichensah-un, Chule twisang ahung letna abonchauva alhohmang gam kahse chun ima hepha louvin aumun ahi; Mihem Chapa hung ni jongle chutobang ding ahi.