Popular Bible Verses from JESAYA 35

Share

Ba ba rekolotsweng ba MORENA ba tla boa, ba fitlha mo Sione ka tuduetso. Boitumelo jo bo sa khutleng bo tla okama ditlhogo tsa bone. Ba tla nna mo boitumelelong le mo lethabong. Bohutsana le diphegelo di tla tshabela kgakala.

Nonotshang diatla tse di repileng! Tiisang mangwele a a kgwetlhang! Rayang ba ba pelo-di-boi lo re: “Gomotsegang, se boifeng! Bonang, Modimo wa lona ke ole. O e tla go busolosa. Tefetso ya Modimo e e tla. O e tla ka osi, o tla re thusa.”

Go tla nna mmila o mogolo teng le tsela e e bidiwang tsela e e boitshepo. Ga e na go gatwa ke ope yo o kgotlelegileng. Ke ya bone ba ba tsamayang mo go yona; mme le fa e le masilo, ga a nke a timela.

Foo matlho a difofu a tla foufologa, ditsebe tsa disusu di tla kabologa.

Foo ditlhotsi di tla tlola jaaka tshephe. Loleme lwa semumu lo tla duduetsa. Metsi a tla phunyega mo sekakeng, dinoka di ela mo nageng e e omeletseng.