Popular Bible Verses from EKESODU 16

Share

Baiseraele ba ba raya ba re: “Ao! Bogolo re ka bo re swetse kwa lefatsheng la Egepeto ka seatla sa MORENA metlheng ele fa re sa ntse re le fa dipitseng tsa dinama, re ja bogobe, re kgora. Jaanong lo re tsisitse kwano mo sekakeng se gore lo bolae morafe otlhe o ka tlala.” Ke fa MORENA a raya Moše a re: “Bona, ke tla lo nesetsa bogobe jo bo tswang kwa legodimong, mme a batho ba tswe go sela jo bo lekanyeng letsatsi le le lengwe ka malatsi otlhe gore ke ba leke, ke bone gore a ba tla sepela ka fa molaong wa me gongwe nnyaya.

Ke fa morafe otlhe wa Baiseraele o ngongoregela Moše le Arone mo sekakeng.

Moše a ba a re: “Go tla dirafala jalo, fa MORENA a lo naya nama maitsiboa gore lo je, le bogobe mo mosong gore lo kgore. Gonne MORENA o utlwile dingongorego tsa lona tse lo mo ngongoregetseng ka tsona. Rona re eng? Ga lo ngongoregele rona, lo ngongoregela MORENA.”

“Ke utlwile dingongorego tsa Baiseraele. Ba ree o re: ‘Maitsiboa lo tla ja nama, kamoso lo tla tsoga lo kgora bogobe. Lo tla lemoga jalo, fa ke le MORENA, Modimo wa lona.’ ”