Popular Bible Verses from Abanya Fĩlĩpĩ 2

Share

Simukole mwatsi omo mwaga wʼobutimane, kutse busana nʼeriyipipa, nĩkwa mũyĩkehaye, imukaganza obuli mundu mo mubuya kwilaba ĩnywe. Mũtegaye ebindu byʼabandi butsira erilwira ebyawe bisa.

Mubye nʼobũlengekanĩa obũ bwa Kristo Yesu

oyũ, nomo anabya Nyamuhanga kwenene, mwatayilwira eriringirirana na Nyamuhanga. Nĩkwa mwayĩtũtũla olukengerwa luwe, mwayiyira ngʼomugombe, mwabutwa ngʼabandu, mwaminyikala omo kĩsosekanĩo kyʼomundu. Neryo mwayĩkehya, mwabya akowa, erĩhĩka oko luholo, lo luholo lwʼomusalaba.

Kusangwa ni Nyamuhanga yukakola omwisi wenyũ, imwabya mũkalĩga nʼerikola ebĩkamũtsemesaya.

Kyaleka Nyamuhanga ĩnĩamũhamya kutsibu, nʼerimuha erĩna erĩlabĩre awandi mena. Neryo abosĩ basyakũkamira erĩsĩkya erĩna lya Yesu, abali omo lubula, nʼomo kihugo, nʼabali eyĩkwa oko kihugo. Obuli mundu asyatũlaganĩa ko Yesu Kristo ni Mukama, busana nʼeriha olukengerwa uku Nyamuhanga Tata.

Mukole emyatsi yosĩ butsira eriyitonga kutse buhaka, Imwatoka eribya abakũmayĩre nʼeribya bandu babuya, abana ba Nyamuhanga abate ko mwatsi, abĩkere omo katĩkatĩ kʼekihugo kĩhengemĩre, nʼekyʼomwaga. Nenyũ mukaminyikala ngʼesyotala omo kihugo.

Neryo, abanze bage, ngoko mwabya mũkowa emigulu yosĩ omugulu nabya nenyũ, nĩkwa lino mowe kwilaba omugulu ndeho. Mũberereraye erilama lyenyũ omwʼiubaha nʼerititimana.