Popular Bible Verses from Ashlish 13

Share

Ayns shoh ta creenaght. Lhig dasyn ta tushtey echey coontey earroo yn veisht; son earroo dooinney eh; as ta’n earroo echey shey cheead three‐feed as shey.

As ver ooilley cummaltee yn theihll ooashley da, nyn enmyn nagh vel scruit ayns lioar bea yn Eayn er ny varroo er‐dy hoshiaght y theihll.

As t’eh cur er ooilley chammah beg as mooar, berchagh as boght, seyr as ayns bondiaght, dy ve cowrit ayns nyn laue‐yesh, ny ayns glare nyn eddin: As nagh voddagh dooinney erbee kionnaghey ny creck, agh eshyn va cowrey, ny ennym y veisht er, ny earroo yn ennym echey.

Eshyn ta leeideil gys cappeeys, hed [eh hene] gys cappeeys: Eshyn ta marroo lesh y chliwe, bee eh er ny varroo lesh y chliwe. Ayns shoh ta meenid as credjue ny nooghyn.

As hass mee er genniagh ny marrey, as honnick mee beisht troggal ass yn aarkey, lesh shiaght king, as jeih eairkyn, as er e eairkyn jeih attaghyn, as er ny king echey va enmyn mollaghtagh.

As va pooar er ny choyrt da dy chaggey noi ny nooghyn, as dy gheddyn yn varriaght orroo: as va pooar er ny choyrt da harrish dy chooilley chynney, as glare, as ashoon.

As t’eh molley adsyn ta cummal er y thalloo, liorish ny mirrillyn shen va pooar echey dy yannoo ayns shilley’n veisht, gra rish cummaltee’n thallooin dy yannoo jalloo da’n veisht va lhottit liorish y chliwe, as va bio. As va pooar echey dy choyrt bioys da jalloo yn veisht, dy jinnagh jalloo yn veish e chammah loayrt, as cur er whilleen as nagh jinnagh ooashley da jalloo yn veisht dy ve er nyn goyrt dy baase.

As va’n veisht honnick mee goll rish leopard, as va ny cassyn echey myr cassyn bear, as e veeal myr beeal lion: as hug y dragon e phooar da as e stoyl, as reill mooar.

As va beeal er ny choyrt da, loayrt reddyn mooaralagh as mollaghtagh; as va pooar echey dy hannaghtyn daa vee as da‐eed.

As honnick mee unnane jeh ny king echey, myr dy beagh eh guint dy baase; as va’n lhot baaish echey er ny lheihys: as hie ooilley’n seihll ayns yindys geiyrt er y vaagh.

As hug mee my‐ner beisht elley troggal ass y thalloo, as va daa eairk echey goll‐rish eayn, as loayr eh myr dragon. As t’eh goaill er ooilley pooar yn chied veisht va roish; as t’eh cur er y theihll, as ny cummaltee echey, dy choyrt ooashley da’n chied veisht, yn lhot baaish echey v’er ny lheihys.