Popular Bible Verses from Hebrewnee 11

Share

Nish ta credjue slane bree ny reddyn ta shin treishteil dy gheddyn, shickyrys reddyn nagh vel [foast] ry akin. Son liorish ren ny shenn‐ayryn cosney goo mie.

Agh fegooish credjue te neu‐phossible eshyn y wooiys: son eshyn ta cheet gys Jee, shegin da credjal dy vel Jee ayn, as dy vel eh cooilleeney adsyn ta dy imnea‐agh shirrey huggey.

Trooid credjue ta shin toiggal dy row ny seihllyn er nyn groo liorish goo Yee, myr shen nagh row ny reddyn ta ry akin jeant jeh stoo erbee dy row eisht ayn.

Liorish credjue tra va Abraham er ny eam dy gholl magh gys ynnyd v’eh lurg shen dy gheddyn son eiraght, v’eh biallagh; as jimmee eh magh, gyn fys echey cre gys v’eh goll. Liorish credjue v’eh ny hroailtagh ayns cheer y ghialdynys, myr ayns cheer y yoarree, cummal ayns cabbaneyn marish Isaac as Jacob, co‐eiraghyn mârishyn ’sy ghialdynys cheddin.

Liorish credjue, Noah, myr va raaue er ny choyrt da liorish Jee mychione reddyn nagh row foast ry‐akin, greinnit lesh aggle, ren eh arg y hroggal dy hauail e lught‐thie: liorish shoh ren eh yn seihll y gheyrey, as haink eh dy ve eirey jeh’n chairys shen ta liorish credjue.

Liorish credjue va Enoch goit seose gys niau fegooish fakin baase; as cha row eh ry gheddyn, er‐yn‐oyr dy row Jee er ghoaill eh: son roish da v’er ny ghoaill seose v’an feanish shoh echey, dy ren eh Jee y wooiys.

Liorish chredjue ren Abel chebbal gys Jee oural s’ooasle na Cain, liorish hooar eh feanish, dy row eh cairagh, Jee soiaghey jeh e ghiootyn: as liorish shoh ga dy vel eh marroo, t’eh foast loayrt.

Trooid credjue hooar Sara ee hene niart dy ghientyn, as ren ee lhiannoo y ymmyrkey lurg y traa cooie, er‐yn‐oyr dy row ee jeeaghyn ersyn dy ve firrinagh va er ghialdyn.

Son v’eh jerkal rish ard‐valley er undinyn [shickyr], jeant as troggit liorish Jee.

Liorish credjue tra va Moses er jeet gys eash, dob eh dy ve enmyssit mac inneen Pharaoh; Goaill myr reih dy hurranse seaghyn marish pobble Yee, na dy ghoaill soylley jeh eunys peccah son earish; Jeeaghyn er oltooan Chreest berchys smoo na tashtaghyn Egypt; son va sooill echey gys cooilleen yn leagh. Liorish credjue daag eh Egypt, gyn aggle er roish jymmoose y ree: son ren eh gymmyrkey eh dy dunnal, myr ’sy chilley echeysyn ta ass fakin.

Liorish credjue ren Abraham tra v’eh er ny phrowal, chebbal seose Isaac: as ren eshyn hooar ny gialdynyn e ynrycan er‐ny‐gheddyn mac y hebbal seose

Liorish credjue ve, nagh ren yn ven‐oast Rahab cherraghtyn mâroosyn nagh ren credjal, tra hug ee oltagh‐bea da ny brialtee ayns shee.

Liorish credjue hie ad trooid y faarkey jiarg, myr er thalloo chirrym: y lheid cheddin tra ghow ny Egyptianee orroo dy yannoo, v’ad baiht.

Liorish credjue huitt voallaghyn Yericho, lurg daue ve combaasit mygeayrt shiaght laa.

Liorish credjue dreill eh yn chaisht, as spreih yn uill, nagh jinnagh eshyn ren stroie yn chied‐er‐ny‐ruggey lhie e laue orroo.

Liorish credjue ren Joseph roish e vaase, loayrt mychione immeeaght cloan Israel; as hug eh sarey mychione e chraueyn.

Liorish credjue ren Jacob tra v’eh er y lhiabbee‐vaaish, daa vac Yoseph y vannaghey; as hug eh ooashley, croymmey er kione e lorg.

Liorish credjue ren Isaac Jacob as Esau y vannaghey mychione reddyn va ry‐heet.