Popular Bible Verses from Apokaliipsis 17

Share

Tul laʼ motx ibʼan vet txhʼaʼo tuchʼ JesuKriisto uvaʼ ech tilix, eche chelem karneʼl. Aʼetz JesuKriisto uvaʼ ech tilix, eche chelem karneʼl, laʼ oleʼv tiʼ teesalaq iqʼij. Tan aʼe, uvaʼ palnaʼq tiqleʼm tiibʼa inqʼa bʼaala. Atz aʼe u mam iqʼesal tiibʼa inqʼa mam iqʼesal. Jankʼaletzxh inqʼa xaol, inqʼa laʼ txhʼuyeʼv tiʼ JesuKriisto uvaʼ ech tilix, eche chelem karneʼl, tan aʼetz inqʼa xaole, inqʼa saʼel veteʼ; atz inqʼa chʼexel veteʼ; atz inqʼa kʼuqlebʼxh kʼuul tatin s-kʼatza, —xeʼt u aanxel s-ve.

Yaʼne ul vaʼl u aanxel, antxh vaʼl uvaʼ xoʼl juqvaʼl inqʼa aanxel inqʼa atich ok juunil koopa tiqʼabʼ. Tul ech tal u aanxel s-ve s-eche: —Avul tzitza. Tul toq inkʼutxh vikʼaxbʼisal inqʼa xaol see, inqʼa palsan yol, inqʼa at tu mam tenam uvaʼ Vaviloonia chich eʼli, u tenam uvaʼ mam xaomla aʼ nik ipal s-tuul. Tan echaq tatin t-inqʼa ipaʼv, eche tatin vaʼq lampaqʼla ixoq.

U txoo uvaʼ qat eela, tan atiche, poro yeʼl vet s-txheel. Pet aloq aʼ laʼ jaʼk vet ul u txoo tuul val u mam jul uvaʼ yeʼl iyaʼebʼal at bʼen, uvaʼs laʼ titzʼeʼv vet inpaqte. Tul tira laʼ sotz ikʼuul inqʼa xaol vatz u txʼavaʼ tiʼ tilt itxhej u txoo inpaqte, u txoo uvaʼ atiche, atz yeʼlich vet tinjolol qʼij. Pet aloq tetxhal laʼ isotzsa el quBʼaal Tiuxh u txoo uvaʼe. Tul laʼ motx ok vet bʼen jankʼal inqʼa xaol tiʼ u txoo, inqʼa laʼ sotz ikʼuul. Aʼetz laʼ sotz ikʼuul inqʼa yeʼl ibʼij tzʼibʼamal tuul u uʼ tetz qʼij saq kʼatz quBʼaal Tiuxh, inqʼa jit yekich itxaj quBʼaal Tiuxh uvaʼs iviinqixsat u vatz txʼavaʼ.

Tul tzʼibʼamich ok val u yol tipala uvaʼ at nik elkaʼpun. Tul ech nikich tal s-eche: —U MAM TENAM VAVILOONIA, AʼE U TXUTX IBʼAAL INQʼA LAMPAQʼIL UVAʼ NIK IBʼANAX VATZ U TXʼAVAʼ, ATZ TXUTX IBʼAAL INQʼA TXOQEBʼAL KʼUUL, —chichich u tzʼibʼ.