Popular Bible Verses from Evreeos 11

Share

Echetze, tan tiʼ u kʼuqlebʼ qukʼuul tiʼ quBʼaal Tiuxh, tul nik qootzaqivat uvaʼ tetxhal laʼ elaʼpun kam uvaʼ nik qutxʼebʼeʼ uvaʼ alel ka taʼn. Tan tira txhabʼamal vet tok t-quviʼ uvaʼ at vaʼl alel ka, kʼuxh yeʼx qileʼtaʼ. Tan tiʼ vikʼuqbʼat inqʼa kʼuy qumam ikʼuul tiʼ quBʼaal Tiuxh, tul oksal iqʼij taʼn quBʼaal Tiuxh.

Pet oqetz yeʼl oʼ nik qukʼuqbʼa qukʼuul tiʼ quBʼaal Tiuxh, tul keʼchetz koq laʼ quchiibʼisat taanima quBʼaal Tiuxh. Tan jaʼl uvaʼ laʼ ijetxhoʼk tibʼ kʼatz quBʼaal Tiuxh, tul aʼ isaʼ uvaʼ laʼ iqeja. Atz laʼ kʼuqeʼv ikʼuul uvaʼ at quBʼaal Tiuxh. Tul laʼat iqea, atz laʼ kʼuqeʼv ikʼuul uvaʼ laʼ aqʼax vaʼl itxʼaqaʼm inqʼa nik txhokon quBʼaal Tiuxh.

Tiʼetz qukʼuqbʼat qukʼuul tiʼ quBʼaal Tiuxh, tul qootzaq veteʼ uvaʼ tuchʼ kuxh viyolon quBʼaal Tiuxh iviinqixsavat jankʼal u txʼavaʼ tuchʼ u amlikaʼ. Aʼetz vet inqʼa nik qileʼ nik kʼutxhun uvaʼ, aʼ viinqixsan inqʼa kam uvaʼ yeʼ nik qileʼ.

Atz tiʼ vikʼuqbʼat Avraʼaam ikʼuul tiʼ quBʼaal Tiuxh, tul inima viyol quBʼaal Tiuxh tiʼ teleʼl tu txʼavaʼ tal uvaʼ atiche. Tul ikʼaq vet bʼen tibʼ Avraʼaam tu txʼavaʼ uvaʼ laʼich tetza taʼn quBʼaal Tiuxh. Tul yeʼich tootzaq Avraʼaam tal atilich u txʼavaʼ. Atz tiʼ vikʼuqbʼat Avraʼaam ikʼuul tiʼ quBʼaal Tiuxh, tul jit tira itxhabʼa Avraʼaam ijeqeʼv tu txʼavaʼ uvaʼ tal quBʼaal Tiuxh taqʼax s-te. Pet ech kuxh ibʼan tiʼ tatin, eche invaʼq xaol uvaʼ vaʼlen tenam tzajnaʼqle. Pet yiqxh taqʼ kuxh jaʼ vaʼl ipaʼtebʼal patxh tiʼ tatin s-tuul. Tul echat kuxh ibʼan Isaake tuchʼ Jakoov, inqʼa motxat kʼulun u yol tiʼ u txʼavaʼ uvaʼ tal ka quBʼaal Tiuxh.

Atz tiʼatetz vikʼuqbʼat Noee ikʼuul tiʼ quBʼaal Tiuxh, tul inima Noee kam uvaʼ tal quBʼaal Tiuxh s-te tiʼ inqʼa yeʼxnaqich utxhoq, tul iqeja. Atz ibʼitetz vet Noee val u aarka, tan ixoʼva Noee ipaʼvin vatz quBʼaal Tiuxh. Tul aʼetz ikolvat vet tibʼ Noee tuchʼ jatvaʼl tatin t-totzotz tuul u aarka. Atz ikʼul Noee u bʼaʼnil tiʼ yeʼ ijaʼp u yol s-tiibʼa, tiʼ vikʼuqbʼat ikʼuul tiʼ quBʼaal Tiuxh. Tul taqʼ jaʼp quBʼaal Tiuxh u yol tiibʼa inqʼa xaol vatz txʼavaʼ tiʼ ibʼen tu kʼaxkʼo tiʼ inqʼa ipaʼv, inqʼa yeʼ motx qeoni.

Tul tiʼetz vikʼuqbʼat Enook ikʼuul tiʼ quBʼaal Tiuxh, tul iqʼol taʼn quBʼaal Tiuxh. Tul yeʼl kamchil tila. Tul yeʼl vet Enook leqexi, tan quBʼaal Tiuxh iqʼon. Tan yeʼnaqich bʼenoq Enook, tul oksal iqʼij taʼn quBʼaal Tiuxh tiʼ vibʼaʼnla txumbʼal. Atz chiibʼ quBʼaal Tiuxh tiʼ Enook.

Tul tiʼetz vikʼuqbʼat Aveel ikʼuul tiʼ quBʼaal Tiuxh, tul bʼaʼnxh inqʼa oya toksa vatz quBʼaal Tiuxh viʼ u tetz Kaiin. Echetz tiʼ u bʼaʼnla txumbʼal uvaʼe, tul oksal iqʼij taʼn quBʼaal Tiuxh, tul bʼen s-bʼaʼn vatz quBʼaal Tiuxh. Tul ikʼul quBʼaal Tiuxh u oya uvaʼ taqʼ Aveel. Atz tiʼat uvaʼ ikʼuqbʼa Aveel ikʼuul tiʼ quBʼaal Tiuxh, tul kʼuxh kamnaʼq veteʼ, poro ile ant kuxh talax viyoltzil s-txheel tiʼ u kʼuqlebʼal ikʼuul.

Atz tiʼ vikʼuqbʼat Avraʼaam ikʼuul tiʼ quBʼaal Tiuxh, tul yeʼxhkam titzʼa s-tiʼ kʼuxh qʼestich veteʼ, atz kʼuxh Saaraxh yeʼ nikich ilon al. Pet txhejetz vet iyakʼil vitxhiʼoʼl Saara, tul ex yanoq vet ikʼuul, tul ex txheoq vet tal. Tan tiʼ uvaʼ ikʼuqbʼa Avraʼaam ikʼuul, tiʼ uvaʼ alon u yol, tul tetxhal laʼich inima viyol; aʼe u quBʼaal Tiuxh.

Tan aʼ nikich itxʼebʼ Avraʼaam topoon t-val u tenam uvaʼ quBʼaal Tiuxh itzʼan, atz quBʼaal Tiuxh bʼiton. Val u tenam uvaʼ txhabʼamalich tatineʼ.

Atz tiʼ vikʼuqbʼat Moisees ikʼuul tiʼ quBʼaal Tiuxh, tul yeʼ tal vet tibʼ Moisees s-tal vimeʼal faraoon uvaʼs ibʼen vet Moisees s-vinaq. Tan aʼ ikʼaq Moisees uvaʼ aʼl bʼaʼn uvaʼ kʼuxh eela laʼich ikʼaxbʼ Moisees tuchʼ inqʼa imol s-tijaq imam Israeelil viʼ uvaʼ, aʼ laʼich ikʼaq Moisees inqʼa atxhaʼv vatz u txʼavaʼ uvaʼ at ipalebʼal, atz uvaʼ laʼ paʼvin Moisees taʼn. Tul aʼ titzʼa Moisees uvaʼ aʼl bʼaʼnich s-te uvaʼ laʼich txhiʼkʼuulali, eche uvaʼ ulbʼel u quBʼaal JesuKriisto viʼ uvaʼ, aʼ laʼich ikʼaq Moisees u txʼijbʼal iqʼij inqʼa aj Ejiipto. Tan aʼ nikich til bʼen Moisees val vitxʼaqaʼm uvaʼ laʼich taqʼ quBʼaal Tiuxh s-te tu amlikaʼ. Atz tiʼ vikʼuqbʼat Moisees ikʼuul tiʼ quBʼaal Tiuxh, tul el tzaan Moisees tuulbʼal Ejiipto. Tan yeʼl Moisees xoʼv te vikʼaʼnal u mam iqʼesal. Pet aʼ kʼuqlich ikʼuul Moisees tiʼ u quBʼaal Tiuxh, kʼuxh yeʼ nikich til Moisees.

Atz tiʼ vikʼuqbʼat Avraʼaam ikʼuul tiʼ inqʼa yol uvaʼ tal quBʼaal Tiuxh s-te, tul iqeja kam uvaʼ tal quBʼaal Tiuxh tiʼ itxhej mamala tij imam. Tan aʼich isaʼ quBʼaal Tiuxh tiltaʼ, oq nuqxh nikich tal Avraʼaam tiʼ vikʼuqbʼat ikʼuul s-tiʼ. Tul ayaʼlxh ikʼuul saʼich itzʼeʼsa ok vatz ikʼaol s-oya vatz quBʼaal Tiuxh. Tul taʼnichxhte vaʼl vatz ikʼaol Avraʼaam.

Atz tiʼ vikʼuqbʼat Raʼaav ikʼuul tiʼ quBʼaal Tiuxh, Raʼaav uvaʼ lampaqʼiche, tul yeʼl Raʼaav kami uvaʼs motx ikam inqʼa aj tenam Jerikoo, inqʼa palsanaq yol. Tan motx ikʼul Raʼaav inqʼa vinaq tibʼaʼnil, inqʼa muqich tokaʼp tu mam tenam Jerikoo tiʼ tilix kam nikich tutxh tu tenam.

Atz tiʼ vikʼuqbʼat Moisees ikʼuul tiʼ quBʼaal Tiuxh tuchʼ inqʼa tij imam Israeel, tul motx pal paʼl tuul u Kaq Maar. Tul ech vete vatz txʼavaʼ uvaʼ tzaqal kuxhtuʼ motx palka. Poro aʼetz motx tal inqʼa aj Ejiipto uvaʼ echatxh saʼich motx ipal paʼle, eche uvaʼ ibʼan inqʼa tij imam Israeel. Poro ech koqe, tan tira motx jiqʼbʼ ka tuul u Kaq Maar.

Atz tiʼ vikʼuqbʼat Josuee ikʼuul tiʼ quBʼaal Tiuxh tuchʼ inqʼa tij imam Israeel, tul motx isuti tiʼ u tenam Jerikoo tuulbʼal juqvaʼl qʼij. Tul tilp vet kuʼl inqʼa tzʼach uvaʼ sutimich tiʼ u tenam Jerikoo taʼn.

Atz tiʼ vikʼuqbʼat Moisees ikʼuul tiʼ quBʼaal Tiuxh, tul inima Moisees u qʼij Ipal Aanxel tuchʼ vitzikut u kaq vatz jubʼal tiʼ yeʼ iyatzʼax el inqʼa bʼaxa ivinaq al inqʼa tij imam Israeel taʼn u aanxel uvaʼ yatzʼon el inqʼa bʼaxa ivinaq al inqʼa aj Ejiipto.

Atz tiʼ vikʼuqbʼat Xhuʼl ikʼuul tiʼ quBʼaal Tiuxh, tul tal ka Xhuʼl uvaʼ, tetxhal laʼich el tzaan inqʼa imol Xhuʼl s-tijaq imam Israeel tuulbʼal Ejiipto; aʼe uvaʼs laʼich ikam vet Xhuʼl. Atz ibʼekʼat ka Xhuʼl te inqʼa tij imam Israeel uvaʼ tetxhal laʼich iqʼol bʼen inqʼa ibʼaqil Xhuʼl taʼn.

Atz tiʼ vikʼuqbʼat Jakoov ikʼuul tiʼ quBʼaal Tiuxh, tul taqʼ Jakoov bʼaʼnil tiibʼa juunil inqʼa ikʼaol Xhuʼl uvaʼs bʼiitich kuxh vet ikam Jakoov. Poro aʼ taqʼvat vet Jakoov talal tiibʼa vibʼaara, tiʼ inatxhkʼuulal Tiuxh.

Atz tiʼ vikʼuqbʼat Isaak ikʼuul tiʼ quBʼaal Tiuxh, tul tal ka bʼaʼnla yol tiʼ Jakoov, atz tiʼ Esauu uvaʼ tetxhal laʼich ul u bʼaʼnil s-tiibʼa.