Tul aʼ nik vabʼi te u quBʼaal Tiuxh uvaʼ laʼ ilotxh ex, atz laʼ taqʼ iyakʼil vetaanxelal tuchʼ viTiuxhil. Tan yeʼl iyaʼebʼal imotxebʼal inqʼa ibʼaʼnil quBʼaal Tiuxh. Atz nikat vabʼi te quBʼaal Tiuxh uvaʼ tira laʼ atin quBʼaal JesuKriisto tetaanima, tiʼ vekʼuqbʼat ekʼuul s-tiʼ. Tul tira atxh etaanima tiʼ u quBʼaal JesuKriisto laʼ ibʼana. Tul nikat vabʼi paqte te quBʼaal Tiuxh uvaʼ tira txhabʼamoq etatin tiʼ ibʼanax inqʼa kam tibʼaʼnil s-kaqaayil tiʼ ekʼutxhtaʼ uvaʼ atxh etaanima sevatzaq laʼ ibʼana, eche itxhabʼal ibʼen taqʼil viʼoq tzeʼ t-txʼavaʼ. Echetz tiʼ uvaʼ tiraxh laʼ etootzaqi s-bʼaʼn jankʼalxhte u taanima u quBʼaal JesuKriisto s-qiʼ, oʼ inqʼa niman tetz, eche invaʼq kam uvaʼ sibʼxh ivatz, atz sibʼxh toq, atz sibʼxh at jaʼ, atz sibʼxh at bʼen. Aʼetz uvaʼe, nik injaq te quBʼaal Tiuxh uvaʼ laʼ etootzaqi, atz laʼ tootzaqi jankʼal inqʼa niman tetz. Tul nikat vabʼi te quBʼaal Tiuxh uvaʼ tira laʼ bʼen sete uvaʼ sibʼ taanima u quBʼaal JesuKriisto setiʼ. Tan tira sibʼ palnaʼq taanima quBʼaal JesuKriisto setiʼ, viʼ uvaʼ nik etoleʼv tiʼ tootzaqileʼ. Echetz tira tzʼeqel vet etxumbʼal laʼ ibʼana, eche jankʼal vitxumbʼal u quBʼaal Tiuxh.