Popular Bible Verses from 1 Xhun 2

Share

Yeʼetz etoksa etaanima tiʼ ibʼanax inqʼa paʼv, eche uvaʼ nik ibʼan inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh. Tul yeʼ ok bʼen etaanima tiʼ tatxhval inqʼa kam uvaʼ nik tatxhva inqʼa xaol vatz txʼavaʼ, inqʼa yeʼ ootzaqin tetz Tiuxh. Tan jaʼl u xaol uvaʼ een kuxh taanima tiʼ ibʼanax inqʼa paʼv, eche uvaʼ nik ibʼan inqʼa xaol vatz txʼavaʼ, tul aʼetz uvaʼe, yeʼl tu taanima visaʼax quBʼaal Tiuxh uvaʼ, aʼe viBʼaal.{*} Tan jankʼal inqʼa atxhaʼv uvaʼ nik ibʼan inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh, aʼe inqʼaa: Nik tatxhva ibʼanax inqʼa kantxhaq tuchʼ vitxhiʼoʼl; nik tatxhva tetzataʼ kam uvaʼ josqʼilxh nik til tuchʼ u bʼaqʼ ivatz; nik tatxhva toksal iqʼij tiʼ jankʼal inqʼa at s-xeʼ. Jankʼaletz inqʼa atxhaʼv inqʼae, tan jitetz een tzajnaʼqle kʼatz quBʼaal Tiuxh; pet een tzajnaʼq kʼatz inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh.

Pet aloq jankʼal inqʼa xaol vatz txʼavaʼ, inqʼa yeʼ ootzaqin tetz Tiuxh, tuchʼ jankʼal inqʼa kam nik tatxhva vatz u txʼavaʼ, tan toq paloq paʼl. Pet ech koq inqʼa xaol, inqʼa aʼ nik ibʼan kam uvaʼ nik isaʼ quBʼaal Tiuxh, tan yeʼl iyaʼebʼal imotxebʼal toq tatineʼ.

Jaʼl uvaʼ nik alon uvaʼ txhabʼamal tatin tuchʼ quBʼaal Tiuxh antetzxh ibʼan vet, eche uvaʼ ibʼan quBʼaal JesuKriisto.

Ex inqʼa nik inchiibʼ setiʼ, ex inqʼa, eche kʼaol inmeʼal etatin sinvatz, nik intzʼibʼa bʼen inqʼa yol inqʼaa sete, tiʼ uvaʼ yeʼl ex laʼ paʼvin ex. Pet oqetz at invaʼq ex, uvaʼ laʼ paʼvin ex, tul atetz vaʼl oksan quyol vatz quBʼaal Tiuxh tiʼ ijaqax kuya. Aʼe u quBʼaal JesuKriisto uvaʼ jikxhtuʼ.

Jaʼl uvaʼ ech nik tal s-eche: —Vootzaql vet quBʼaal JesuKriisto, —chiche, tul yeʼ nik inima inqʼa ibʼekʼbʼal Jesuus, tzʼeqol tzietz kuxhte u xaol uvaʼe. Tul yeʼletze vinuqul nik ibʼaneʼ.

Tul tzitzietz nik bʼenk s-qe uvaʼ qootzaq vet quBʼaal JesuKriisto, oq nik qunima inqʼa ibʼekʼbʼal.

Jaʼl uvaʼ nik alon uvaʼ, aʼ vet nik ibʼan u bʼaʼn, aʼetz nik taleʼ uvaʼ at vet tu qʼij saq. Pet oqetz nik iyan ivatz te vimol, tul antetz kuxh nik ibʼane u paʼv, eche vaʼq xaol uvaʼ tokto atila.

Tul jaʼletz koqe u tzʼeqol tzij, pet aʼetze, uvaʼ yeʼ nik qeon uvaʼ, aʼ Jesuuse u Kriisto. Tan jaʼl uvaʼ yeʼ nik qeon u quBʼaal Tiuxh, viBʼaal u Kʼaola, aʼetz uvaʼe, nik itxhiʼan tiʼ u quBʼaal JesuKriisto.

Tan jaʼl uvaʼ yeʼ nik qeon uvaʼ Tiuxh u quBʼaal JesuKriisto, u Kʼaola, tul aʼetz uvaʼe, jit vaʼl iyol tuchʼ quBʼaal Tiuxh. Pet jaʼl uvaʼ nik tal tibʼ s-niman tetz Jesuus, viKʼaol Tiuxh, tul aʼetz uvaʼe, vaʼl iyol tuchʼ quBʼaal JesuKriisto, atz vaʼl iyol tuchʼ quBʼaal Tiuxh inpaqte.