Popular Bible Verses from Kufuma 10

Share

Nupya Yawe anena Mose ati, “Yanga kwi sano unene Falao uti, ‘Nene natindenga kuti aliwe na yacilolo yakwe yakome myenzo pakuti incite vizungusyo pakasi kao. Nkulonda mwalondolwela ana inu na aizikulu inu pa vizungusyo vii nu kuti mwayalondolwela vino nalenzile aina Eguputo kuti yaloleke atumpe. Lyene mwensi mulamanya ukuti Nene indi Yawe.’ ”

Nupya Yawe anena Mose ati, “Konzolola ikasa lyako usonte mwi yulu, pakuti uleke kuye imfinzi ikome fititi ino imaandatila impanga yonsi ya Eguputo.” Mose akatusya ikasa lyakwe mwi yulu, ni mfinzi iya mu Eguputo monsi pa manda yatatu. Aina Eguputo yakwata kanda cakuti yatalolanga nanti umuntu wino ali pipi, nupya kutali umuntu nanti umwi uwatazile afuma pa ng'anda yakwe pa nsita ilya. Lelo aina Izlaeli kuno ikalanga kwene kwali uluswepo.

Caleka Mose akatusya intuwa mwi yulu na Yawe alenga umuza ukufuma ku ufumondaka kuti upunge. Umuza upunga uwanda onsi usiku nu musanya. Uwanda uno walondelilepo lino ilanzi likutunka, makanta ala wataandalala impanga yonsi ya Eguputo. Makanta aiza mu mikumbi mikumbi nga aandalila mu Eguputo monsi. Lyali ikumbi lyakwe makanta likulu cuze lino litatazile liloleke mwi landwe lya mpanga ya Eguputo nupya litalatala liloleke.