Popular Bible Verses from Romebi 8

Share

Anyi alɛ nyi fanɛ asɔ kikɛ to, Ebɔrɛ bee wora asheŋ nna nɛ a bee ba abar so m ba kaa ki asɔ lela a sa mbe beshapo nɛ e tre m ba mo kutɔ fanɛ b ba kaa wora mbe aparsheŋ na.

Ŋkpal manɛ so, m baa nyi geeŋ nna fanɛ shɛŋ shɛŋ maaŋ tiŋ n lara kasha nɛ e kɔ a sa anyi na anyi so. Nɛ an wu ŋko an wɔ ŋkpa to gba, anyi maaŋ tiŋ n lar mbe kasha na to. Emalaika ŋko mbuibi lubiana ŋko asheŋ nɛ a bee wora naniere ŋko amo nɛ a beeŋ wora kachako gba ŋko eleŋana maaŋ tiŋ n lara kasha na anyi so. Shɛŋ maŋ wɔ durnya ere be esoso ŋko kumo be kaseto nɛ k tiŋ n lara mbe kasha na ashi anyi so. Shɛŋ shɛŋ maŋ wɔ durnya ere kikɛ to nɛ k tiŋ n lara anyi ashi Ebɔrɛ be kasha nɛ k bɔla an Nyɛnpe Kristo Yesu so a la anyeya na to.

Loŋ koŋwule na malɛ nɛ Kiyoyu na bee ba m ba kaa chɛ anyi mo nɛ an maŋ kɔ eleŋ ashi yirda na to na to. Anyi maŋ nyi kananɛ k daga fanɛ an kule Ebɔrɛ gba, ama Kiyoyu na gbagba e naa bugi kagbene a kule kabɔrɛkule nɛ k bee mɔ kɔnɔ a sa anyi.

To, asheŋ nɛ an nu ere kikɛ be kaman, nuso nɛ anyeeŋ kaŋɛ? Nɛ Ebɔrɛ baa wɔ anyi be kaman, wanɛ e naaŋ tiŋ m pɔɔ anyi so?

Bumo nɛ b wɔ Kristo Yesu to naniere bre, kejimbri be kasogberge maŋ naa wɔ bumo so.

Keshin nɛ kapɔr lubi ere e baa wɔ fo nfɛra bee yɛr fo luwu to nna nɛ keshin nɛ Kiyoyu na e baa wɔ fo nfɛra malɛ bee yɛr fo ŋkpa nɛ kagbenewushi to.

Kashenteŋto, shɛŋ maaŋ tiŋ n lara mbe kasha ashi anyi so. Kusɔ kama malɛ kikɛ to an bɔla emo nɛ e daŋ sha anyi na so nna a kɔ eleŋ kusɔ kikɛ so.

M baa nyi geeŋ fanɛ tɔrɔ mo nɛ anyee nya naniere maaŋ tiŋ n fo kemaŋkura nɛ Ebɔrɛ beeŋ bugi to n sa anyi na kikɛ so kuraa.

To, manɛ e naaŋ tiŋ n lara kasha nɛ Kristo kɔ a sa anyi ashi anyi so? Tɔrɔ ŋko awurfoŋ ŋko basa be kekɔrfɛ anyi ŋkpal anyi be yirda so ŋko akoŋ ŋko ketir ŋko kenishipere ŋko luwu bre e naaŋ tiŋ n lara mbe kasha ashi anyi so?

Ebɔrɛ nɛ e bee wu basa be ŋgbene to na e nyi Kiyoyu na be nfɛra. Kiyoyu na malɛ e naa bɔla ekpa nɛ k bee par Ebɔrɛ so a kule mo a sa mbe basa.

Bekama nɛ Ebɔrɛ be Kiyoyu na bee juŋkpar bumo na kikɛ la Ebɔrɛ be mbia nna.

Bumo nɛ b wɔtɔ a bɛ bumo be kapɔr lubiana be keŋini so, asɔ nɛ bumo be eyurana na bee sha na e wɔ bumo be nfɛra na. Bumo nɛ bumo alɛ wɔtɔ a bɛ Kiyoyu Cheeŋ na be keŋini na so, asɔ nɛ Kiyoyu Cheeŋ na bee sha na e wɔ bumo be nfɛra.

Esa nɛ e maŋ mɔn anyi mo gbagba Pibinyɛn nseŋ ta mo m bɔɔ basa enɔ ŋkpal anyi kikɛ so na, manɛ nna nɛ e maaŋ bugi kagbene n sa anyi kusɔ kikɛ n ti mo Pibi so?

Kiyoyu na malɛ gbagba e naa chɛ anyi be ayoyu to a ŋini fanɛ an la Ebɔrɛ be mbia nna kashenteŋto. To, nɛ anyi alɛ baa la mbia bre, kumo ere anyeeŋ nya enɛfa nɛ e kɔ a jo mbe basa na. Kumo be kaman nɛ anyi nɛ Kristo e naaŋ nya kusɔ nɛ Ebɔrɛ kɔ a sa mo na, ŋkpal manɛ so, nɛ an baa tu Yesu a ji mbe awurfoŋ na fanɛ kananɛ e daŋ ji na, anyi alɛ beeŋ naŋ tu mo n nya mbe kemaŋkura na.

Amoso, nyiŋgbasa baŋ shin nɛ kapɔr lubi ere wɔ mbe nfɛra, kumo ere e ki Ebɔrɛ mo doŋ nna na, ŋkpal manɛ so, e maa nu a sa Ebɔrɛ be mbra na. Kashenteŋto, e baŋ maaŋ tiŋ n nu n sa kumo nna gba kuraa.

Ebɔrɛ be kepɔrso kikɛ nyam malɛ baa jɔŋ kumo be aya so nna a jo saŋɛ nɛ Ebɔrɛ beeŋ lara mbe mbia efuli na.

Ŋkpal manɛ so an baa nyi fanɛ yili kulubi be sososo na m ba fo mbre, kepɔrso kikɛ bee shu ebesa nɛ k du fanɛ kakurge to be ebesa na to nna.