Popular Bible Verses from Doˆ-iˇ 12

Share

“Kʼoeˇ ngeh miˇ, Iˇjiˇtuˆ miˇ kʼahˬ-ahˇ ngaˇ iˇ paˆ gʼeh-awˇ, dehꞈ beh beh le-euˬ aˬ li aˬ yuiꞈ yawˬ gʼaˬ na luꞈ hawˇ-eu, jeˬ zaˬ deuˬ laꞈ kʼoeˇ dehꞈ beh beh le-euˬ aˬ buˬ deuˬ yawˬ mawˇ na luꞈ bi shiˇ-awˇ, Iˇjiˇtuˆ tsawˇ haˬ deuˬ-euˬ miˬ yehˇ dawˬ tawˆ luꞈ-ahˇ ngaˇ kʼehˬ nehˬ kʼaˆ nehˬ ma. Laˇ gʼoˆ-ahˇ lehꞈ taˬ-euˬ shiˬ kʼoeˇ-aˬ, naw maꞈ jawˇ-eu nymˇ deuˬ-ahˇ tseˇ paˆ-awˇ haw siˬ nya-eu gʼaˇ duˬ, bi siˬ bi mawˇ-eu jeˬ pyeuꞈ-eu ma. Iˇjiˇtuˆ tsawˇ haˬ-ahˇ ngaˇ kʼehˬ nehˬ kʼaˆ nehˬ luꞈ ngeh, shiˬ kʼoeˇ-ahˇ ngaˇ ya mawˇ naˇ, naw maꞈ-ahˇ maˬ laˆ tahˬ maˬ laˆ naˇ ni, bi buˬ bi law-iˇ ma.

Aˇ nah heu nah-ahˇ, Sahˬpaˬ Miˬyehˇ pyeuꞈ-eu ngaˇ mˇ-eu gaˇ-ahˇ noeˬ keuˆ-awˇ, lah-eu daw-eu laꞈ kʼoeˇ, ngaˬ-ahˇ uˬ duˬ tahˬ-eu jeˬ-ahˇ taꞈ leˇ-eu bawˬ-iˬ naw maꞈ ya gʼeh tehꞈ-a. Tiˬ ziˇ saˇ-iˬ tiˬ ziˇ, bawˬ-iˬ heu hmˬ naw maꞈ ya jahˇ daˆ leꞈ meh.”

‘Bawˬ-iˬ heu hmˬ-euˬ dawˬ tsuiꞈ aˬ jeˬ-a’ lehˇ naw maꞈ-euˬ zaˬ deuˬ naw maꞈ-ahˇ naˇ haˬ laˇ ngeh, naw maꞈ heu loꞈ-ehˇ ya ehˇ mehˬ nehˬ tehꞈ-a. ‘Bawˬ-iˬ heu hmˬ-euˬ dawˬ tsuiꞈ-aˬ, Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ mˇ-eu buˬ-iˇ law-iˇ-eu lawˇ-eu shehˇ-eu jeˬ pyeuꞈ-eu meh. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ, Iˇsaˬleˬlaˆ tsawˇ haˬ deuˬ-euˬ nymˇ deuˬ-ahˇ Sahˬpaˬ Miˬyehˇ bi buˬ bi law-iˇ-euˬ meh. Iˇjiˇtuˆ tsawˇ haˬ deuˬ-ahˇ aˬ yawꞈ sehꞈ-awˇ, aˬ dui maꞈ-ahˇ bi law-iˇ nehꞈ laꞈ-euˬ meh’ lehˇ ya ehˇ mehˬ nehˬ tehꞈ-a.” Kʼoeˇ ngeh, Iˇsaˬleˬlaˆ tsawˇ haˬ deuˬ pawˬ tsuiꞈ pawˬ dmˬ dmˬ-awˇ, uˬ duˬ tahˬ-euˬ meh.