Popular Bible Verses from Dawˬmehˬ 8

Share

Smˇ muiˬ bi muiˬ laˇ-euˬ baoˬ biꞈ nehˬ-euˬ gʼaˬ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ meh lehˇ tiˬ jawˇ-iˬ maˬ ngehˇ ni noeˬ keuˆ-awˬ. Naw maꞈ-euˬ aˬ poeˬ aˬ bawˇ deuˬ nehˬ-ehˇ dzaˬ taˬ-euˬ saˇ jaˇ-ahˇ, iˬ nah keuˆ ni aˬ yawꞈ ziꞈ luꞈ-eu miˇ neh, kʼoeˇ loꞈ-ehˇ mˇ-eu meh.

Aˬ yawꞈ naw maꞈ-ahˇ bi mehꞈ bi shuꞈ-awˇ, naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ tiˬ jawˇ-iˬ maˬ ya dzaˬ haw-euˬ maˬ naˆ kaˬ muˇ naw maꞈ-ahˇ aˬ yawꞈ bi dzaˬ-euˬ meh. Dzaˬ-eu dawˇ-eu jeˬ -ahˇ tehꞈ-ehˇ gʼoe-awˇ tsawˇ haˬ zaˬ yaw dehꞈ ya dehꞈ-eu maˬ ngeuˇ-a. Ehˇ kʼawꞈ, Sahˬpaˬ Miˬyehˇ neh kʼaˇ ngehˬ kʼaˇ tmˇ-euˬ jeˬ baˬ da neh tsawˇ haˬ zaˬ yaw dehꞈ ya dehꞈ-eu gaˇ kawˆ naw maꞈ-ahˇ mehˬ nehˬ tsoˆ nehˬ mawꞈ-euˬ miˇ neh, aˬ yawꞈ kʼoeˇ loꞈ-ehˇ mˇ mehˬ-euˬ meh.

Naw maꞈ-euˬ nui ma-ahˇ ya mawˇ-awˇ, aˬ yawꞈ-euˬ zahˇ dawˬ kʼoꞈ dawˬ-ahˇ naw maꞈ caw teh-eu hawˇ-eu maˬ caw teh-eu ya siˬ-eu gʼaˇ duˬ, dzeuˇ laˇ-euˬ oeˬ tseˇ kʼoꞈ laꞈ kʼoeˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ bawˇ tsahˬ bawˇ dahˇ laꞈ kʼoeˇ gʼawˬ myahˇ ni sheuˬ sheuˬ-ehˇ cah-awˇ, naw maꞈ kʼoeˇ taˆ shaˬ-eu zahˬ-eu jeˬ bi keuˆ le-eu laꞈ kʼoeˇ lawˬ haw-euˬ gaˇ noeˬ keuˆ-awˬ.

Kʼoeˇ miˇ neh, naw maꞈ yawˬ ha-euˬ gʼaˬ hawˇ-eu yawˬ ha-euˬ baoˬ-ahˇ gʼoe-awˇ, yawˬ haˇ yawˬ ha smˇ muiˬ muiˬ laˇ-euˬ ma lehˇ tiˬ jawˇ-iˬ taˬ noeˬ.

“Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ maˬ ya ngehˇ ni, yaw kʼaˆ-ehˇ yahˇ yahˇ-ehˇ dehꞈ-awˬ. Iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ-ahˇ, tiˬ dawˬ-iˬ maˬ byehˇ dzeh ni caw teh-awˬ.

Tsawˇ haˬ tiˬ gʼaˬ yawˬ ha-euˬ zaˬ-ahˇ mehˬ-eu tsoˆ-eu loꞈ-ehˇ, naw maꞈ-ahˇ Miˬyehˇ mehˬ nehˬ tsoˆ nehˬ-euˬ gaˇ noeˬ keuˆ-awˬ. Kʼoeˇ miˇ neh, Sahˬpaˬ Miˬyehˇ naw maꞈ-ahˇ dawˬ biꞈ-euˬ loꞈ-ehˇ mˇ-awˬ.

Naw maꞈ kʼaˇ dzaˬ mawꞈ-eu jeˬ ya dzaˬ dehˆ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ laꞈ-euˬ miˇ kʼahˬ kʼoeˇ kʼahˬ ba da neh, aˬ yawꞈ-euˬ guiˬ lahˬ-ahˇ naw maꞈ ja ceuˬ ja ceuˬ-ehˇ jawˇ tehꞈ-a.

Aˬ yawꞈ-euˬ zahˇ dawˬ kʼoꞈ dawˬ-euˬ mehˬ nah caw teh-eu laꞈ kʼoeˇ yaw dehꞈ dehꞈ-awˇ, aˬ yawꞈ-ahˇ guˆ-awˬ.

Bawˇ tsahˬ bawˇ dahˇ laꞈ kʼoeˇ, naw maꞈ bi dzaˬ-eu gʼaˇ duˬ, naw maꞈ-euˬ aˬ poeˬ aˬ bawˇ deuˬ tiˬ jawˇ-iˬ maˬ dzaˬ haw-euˬ maˬ naˆ kaˬ muˇ, naw maꞈ-ahˇ aˬ yawꞈ biꞈ-euˬ meh. Aˇ saˬ saˬ laˇ jawˬ-ehˇ, muiˬ-eu jeˬ guiˬ lahˬ naw maꞈ-ahˇ aˬ yawꞈ biꞈ nehˬ mawꞈ-eu miˇ neh, naw maꞈ kʼoeˇ taˆ shaˬ-eu zahˬ-eu jeˬ bi keuˆ le-eu laꞈ kʼoeˇ, aˬ yawꞈ naw maꞈ-ahˇ lawˬ haw-euˬ meh.

Naw maꞈ kʼaˇ dzaˬ mawꞈ-eu jeˬ jaˆ kuꞈ laˇ-awˇ, naw maꞈ jawˇ-eu gʼaˇ duˬ nymˇ yaw muiˬ deuˬ tsoˆ gʼaˬ-awˇ, naw maꞈ-euˬ mawˇ neˇ hawˇ-eu yawˇ deuˬ maˬ ehˇ, naw maꞈ-euˬ pyuˇ hawˇ-eu shuiˇ deuˬ maˬ ehˇ, naw maꞈ-euˬ myawˬ gahˬ deuˬ maˬ ehˇ, jaˆ myaˬ laˇ ngeh, naw maꞈ nui ma huiˬ laˇ-awˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ka kʼoꞈ doˆ nehˬ laꞈ-euˬ naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˬ ya ngehˇ ni yaw kʼaˆ kʼaˆ-ehˇ yahˇ-awˬ.

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, baw le za le-eu miˇ kʼahˬ-ahˇ naw maꞈ-ahˇ sheuˬ gʼeh luꞈ-eu meh. Lawˇ baˬ yoeˇ-awˇ iˇ beuˆ doˆ-eu miˇ kʼahˬ, miˇ tsaˬ dawˬ dah yoeˇ-eu lawˇ gawˆ deuˬ gawˬ jawˬ gʼaˬ lawˬ doe ni yoeˇ doˆ luꞈ-eu miˇ kʼahˬ, dzaˬ la gʼo cehˇ maˬ ehˇ, aˬ gaꞈ aˇ siˬ maˬ ehˇ, siˬ guˬ aˇ siˬ maˬ ehˇ, aˇ ka uˆ aˇ siˬ maˬ ehˇ, saˬ loˬ tsiˇ maˬ ehˇ, byaˬ byaˬ uiˇ maˬ ehˇ, za dui dui le-eu miˇ kʼahˬ-ahˇ, naw maꞈ-ahˇ sheuˬ gʼeh luꞈ-eu meh. Kʼoeˇ gaˇ, naw maꞈ tiˬ jawˇ-iˬ maˬ ya mehꞈ maˬ ya shuꞈ-eu uˬ taꞈ, tiˬ jeˬ-iˬ maˬ loˬ ni ya dehꞈ dzaˬ tehꞈ-a. Kʼoeˇ gaˇ jaˆ-eu lo guˇ deuˬ laꞈ kʼoeˇ, shmˇ doˆ-awˇ, gawˬ duˇ-ahˇ naw maꞈ guiˬ shuiˇ ya duˬ doˆ geuꞈ tehꞈ-a.

“Naw maꞈ yaw dehꞈ ya dehꞈ-awˇ, myaˬ laˇ behˇ laˇ-eu uˬ taꞈ, Sahˬpaˬ Miˬyehˇ neh naw maꞈ-euˬ aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ miˇ kʼahˬ-ahˇ naw maꞈ ya jawˇ ni, iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ maˬ ngehˇ ni caw teh-awˬ.

Aˇ kʼoꞈ kʼoeˇ oeˬ tseˇ kʼoꞈ laꞈ kʼoeˇ naw maꞈ-euˬ mehˬ tsoeˬ maˬ cehˇ-iˇ-euˬ uˬ taꞈ, naw maꞈ-euˬ aˬ kuiˇ kʼawꞈ maˬ puˬ laˇ-aˬ.

Doꞈ kʼaˆ-eu aˇ lawˇ hawˇ-eu boeˬ kaˬ laˬ ma jawˇ-eu jeˇ dui dui-awˇ guˆ laˇ paˬ-ehˇ gʼeh-eu bawˇ tsahˬ bawˇ dahˇ laꞈ kʼoeˇ, naw maꞈ-ahˇ aˬ yawꞈ sheuˬ gʼeh-euˬ meh. Iˇ cuꞈ maˬ jaˆ-ehˇ gui coˇ ni gʼeh-eu miˇ kʼahˬ kʼoeˇ kʼahˬ laꞈ kʼoeˇ naw maꞈ cah luꞈ ngeh, maˇ jawˆ ni gʼeh-eu kʼaˬ lo-ahˇ, naw maꞈ gʼaˇ duˬ aˬ yawꞈ iˇ cuꞈ bi yoeˇ le-euˬ meh.