Popular Bible Verses from 1 Gawˇliˬtu 6

Share

Naw maꞈ-euˬ gʼawˇ mawˇ-aˬ, Miˬyehˇ neh biꞈ leꞈ-awˇ naw maꞈ-euˬ laꞈ kʼoeˇ jawˇ luꞈ-eu Muiˬ-eu Shawˇ-eu Yaw sahˇ Miˬyehˇ-euˬ uˬ duˬ tahˬ nymˇ pyeuꞈ-eu meh lehˇ maˬ siˬ nya te loˇ. Kʼoeˇ uˬ taꞈ, naw maꞈ-aˬ, naw maꞈ-euˬ maˬ ngeuˇ-a. Miˬyehˇ-euˬ meh. Miˬyehˇ neh aˇ poeˬ biꞈ-awˇ zeuˇ tsehˆ gʼaˬ-euˬ meh. Kʼoeˇ miˇ neh, naw maꞈ-euˬ gʼawˇ mawˇ laꞈ kʼoeˇ Miˬyehˇ-euˬ yaw shehꞈ kʼahˬ sehˇ bi doˆ laˇ-awˬ.

Maˬ tsaˬ maˬ dawˇ-eu tsawˇ haˬ Miˬyehˇ Miˇkʼahˬ laꞈ kʼoeˇ maˬ ya uˇ leˇ-a lehˇ naw maꞈ siˬ duˬ luꞈ meh. Naw maꞈ taˬ noeˬ lehˬ. Aˬ cawˬ nehˬ-ehˇ joe-eu tsawˇ haˬ, tahˬ pahˬ aˬ ma mawˇ kawˇ-ahˇ uˬ duˬ tahˬ-eu tsawˇ haˬ, aˬ cawˬ-euˬ miˬ zaˬ yo zaˬ-ahˇ bahˬ-eu tsawˇ haˬ, kʼaˬ dzeˇ zaˬ cawˬ cawˬ kʼaˬ miˬ sheu-eu tsawˇ haˬ, smˇ kʼoeˬ kʼoeˬ-eu tsawˇ haˬ, nui kʼahˇ huiˬ-eu tsawˇ haˬ, jiˇ baˬ dawˇ yehꞈ-eu tsawˇ haˬ, aˬ cawˬ-ahˇ yehˬ bawˬ sehˇ lu-ehˇ ehˇ-eu tsawˇ haˬ, tahˇ joe joe-eu tsawˇ haˬ, heu deuˬ-aˬ, Miˬyehˇ Miˇkʼahˬ laꞈ kʼoeˇ tiˬ gʼaˬ-iˬ maˬ ya uˇ leˇ-a.

Aˬ cawˬ nehˬ-ehˇ joe-eu jeˬ-ahˇ gʼawˬ tsehˆ tsehˆ-awˬ. Tsawˇ haˬ zaˬ neh mˇ-euˬ iˬ baˇ nui deuˬ dawˬ tawˆ luꞈ gʼawˇ mawˇ-ahˇ coeˬ-eu ciˆ-eu maˬ ngeuˇ-a. Ehˇ kʼawꞈ, aˬ cawˬ nehˬ-ehˇ joe-eu jeˬ mˇ-euˬ tsawˇ haˬ-aˬ, yawˬ ha-euˬ gʼawˇ mawˇ-ahˇ coeˬ ni ciˆ ni iˬ baˇ mˇ gaˇ duˇ-eu meh.

“Ngaˇ maˬ mˇ kʼmˬ-eu jeˬ maˬ jaˆ.” Ehˇ kʼawꞈ, yawˬ jeˬ na luꞈ gaˇ dahˇ tsoeˬ-eu maˬ ngeuˇ-a. “Ngaˇ maˬ mˇ kʼmˬ-eu jeˬ maˬ jaˆ.” Ehˇ kʼawꞈ, aˬ geu jeˬ-euˬ laꞈ oˆ maˬ kaˬ, ngaˇ zaˬ kʼaˆ maˬ geuꞈ.

Sahˬpaˬ Yeˬsuˇ-ahˇ Miˬyehˇ neh bi gʼoꞈ dehꞈ laˇ-euˬ meh. Aˬ dui-ahˇ kʼawꞈ, aˬ yawꞈ-euˬ baoˬ-ahˇ gʼoe-awˇ bi gʼoꞈ dehꞈ laˇ tehꞈ-a.