Popular Bible Verses from RUM 10

Share

Tu' ondung poboroson nu dot okunon nu do, “Tuhan, i Yesus,” om monongkuyaan ko dot id suang do ginawo nu do pinasi do Kinorohingan i Yesus do mantad id kapatayon, om apasi ko no.

Tu' ginawo id tulun o totumbayaan, gisom do romiton iyau'd Kinorohingan tu' nokoulud no iyau dot id Kinorohingan. Om poboroson do tulun diri do mangakun iyau dot otumbayaan, gisom dot apasi nondo iyau.

Om kaa pogi' do monongkuyaan nopo o tulun di habar om, korongou iyolo' di habar, om norongou pogi' i habar nga' haro i' o tulun do minongoi popinsusui do pasal do Kristus.

Nokotulis no dot id suang do Buuk do Kinorohingan o poingkaa, “Tulun nopo di monongkuyaan om a' no oiman-iman,” ka. Komoyon nopoddi om oinsanan nopo o tulun, tu' aiso' i' o pisuayan dot id pialatan do tulun do Yohudi om it okon ko' Yohudi. Iso' noo o Kinorohingan do Tuhan do koinsanai'd tulun. Om manahak i' iyau do barakat do gisom dot a' aayi-ayi' dot id koinsanai'd tulun di mokitulung dau. Om nokotulis dot id suang do Buuk do Kinorohingan o poingkaa, “Koinsanai'd tulun di lumohou'd Tuhan om apasi no,” ka.

Om poingkuro daa o tulun do mongoi poposunud do habar diri, ondung a' iyolo' suhuon? Nokotulis no o poingkaa dot id suang do Buuk do Kinorohingan, “Osonong no kopio o korikatan di tulun di mongigit do Habar dot Osonong do mantad id Kinorohingan!” ka.

Nga' poingkuro daa o tulun do lumohou'd Tuhan dot a' po iyolo' monongkuyaan? Om poingkuro daa iyolo' do monongkuyaan do Tuhan dot a' po iyolo' korongou do pasal dau? Om poingkuro daa iyolo' do korongou do pasal do Tuhan, ondung aiso' o mongoi pomisunud diyolo'?

Nopongo no di Kristus o paantakan di Tourat, om nopupusan noddi o kuasa'ddi. Om kaa pogi'ddi do pointikid-tikid do tulun di monongkuyaan di Kristus om koulud no kawagu dot id Kinorohingan.