Popular Bible Verses from IPOSUS 5

Share

Iyokoyu nopo om tangaanak kou no do Kinorohingan di kosianan dau, iyo nopoddi om tumotos kou no do momit do kowoyo-woyoon do Kinorohingan. Om pokiporintaan no do kosianan ino koposi-posion dokoyu, do miagal do Kristus tu' nosianan dati'. Om pinatahak dau o tinan dau do gisom do napatai dot iyati' o kinapatahakan, do sumiliu do porsombahan dit osonong o wongi' om i kohubayaan kopio do Kinorohingan.

Iyo nopoddi, om sorisidon no kopio o kowoyo-woyoo' do koposi-posion nu. Om kada' kou omit di kowoyo-woyoo' do tulun di basug. Suwai ko' omit kou no di kowoyo-woyoo' di tulun dit oilo. Om pakayon no kopio dokoyu kosonong-sonong o maso dokoyu tu' maso nopodti om maso dot araat.

Om kada' kou pagawuk do waig dot anggur, dot iri nopo om karaag i' dokoyu; suwai ko' mokiporinta' kasai' kou nogi' do Rusod do Kinorohingan. Pakayon no dokoyu i boros do mantad id sinding, om i mantad id sinding di pamarayou'd Tuhan, om i sinding di don rusod, do tontok do mogiboro-boros kou. Om modsinding kou no do mamarayou'd Tuhan do mikuwo'd otood o ginawo. Om mongunsikou kasai' kou no do koinsanai do nunu nopo dot id Kinorohingan i Tapa', dot id suang do ngaran di Yesus Kristus, i Tuhan toko'.

Om kada' kou no kopio kabasug, suwai ko' ilaan no dokoyu ondung nunu i korohian do Tuhan do wonsoyon dokoyu.

Oi kusai, kosianai no di sawo nu, do miagal do Kristus tu' nosianan do sidang om pinatahak dau o tinan dau do gisom do napatai, dot i sidang o kinapatahakan.

Iyokoyu di gulu po nga' hiri id suang do totuong. Nga' baino' nopoddi om hiri kou noddid suang do tanawau, tu' nosiliu kou no do tulun di songonuon do Tuhan. Iyo nopoddi, om mositi' no do poimpasi kou dot id suang do tanawau.

Piinsiriba-riba' kou no, tu' iri no o pomusou dokoyu do Kristus.

Oi tondu', insiriba' no dot id sawo nu, do miagal do minsiriba' ko dot id Tuhan.

Nga' it ayat diri nga' milo i' dot iyokoyu kopio o komoyon: Mositi' no dot osianan o pointikid-tikid do kusai di sawo dau do miagal dot osianan do dau'd tinan. Om pointikid-tikid do tondu' nga' mositi' no do tumotos do momusou di sawo dau.

Nokotulis no dot id Buuk do Kinorohingan o poingkaa, “Iyo nopoddi, om tumongkiad nondo i kusai di tapa' om tina' dau om sumugku' nondo iyau di sawo dau, om osiliu i' iyolo' dot iso-iso',” ka.

Om kada' kou no pomonsoi di wowonsoyon dit aiso' o kotutuk-tutukon, i wowonsoyon di tulun di poimpasi dot id suang do totuong. Suwai ko' poimbulayon ngai' no dokoyu i wonsoyon do miagal diri dot id tanawau.