Popular Bible Verses from PONUGUTAN 10

Share

Om boros ka kawagu di Musa, “Om dinondo no, oi tulun dot Israil, om pokinongou kou no diti pokionuon do TUHAN, i Kinorohingan dokoyu, do mantad id dokoyu: Sambayang kou no dot id TUHAN, i Kinorohingan dokoyu, om wonsoyon ngai' no dokoyu i ponuhuan dau. Kosianai kou no dau, om sumambayang kou no dot id dau do mikuwo'd aayi-ayi' o ginawo om pomusorou dokoyu. Om tumorodok kou no do tumanud do koinsanai di ponuhuan dau. Om patahakon ku dokoyu iti do tadau baino' do maan do koinsanangan dokoyu.

Tu' TUHAN nopo, i Kinorohingan dokoyu om id sawat i' ko' mantad do toinsanan o ponokokinorohingan om agayo o kuasa' dau ko' mantad do koinsanai'd kuasa'd suwai. Iyau nopo om Kinorohingan dit agayo om okoris, om apatut no do mumboyo' ngai' dau. Iyau nopo om a' i' manampaping om a' rumamit do ponisip.

Iyo nopoddi, om mantad do baino', om mositi' no do tumorodok kou dot id TUHAN, om kada' kou nondo kokodou o ginawo.

Om antaan-taan i' kopio dau, om otulid indo o wonsoyon dot id tangaanak dit aiso' o molohing om id tongoondu' di nopuadan. Om osianan i' iyau di tulun do bansa'd suwai di poinsugku' do tulun toko' do momogun-mogun, tu' onuan i' dau iyolo' do taakanon om pakayan.

Royohon no iyau, tu' iyau noo o Kinorohingan dokoyu, om nokito no dokoyu o koinsanai di nongowonsoi dau dot id dokoyu di kongopusahan kopio.

Umboyo' kou nod boros do TUHAN, i Kinorohingan dokoyu, om sumambayang kou no dot id dau, om id dau noo. Kotorodok kou no dot id dau. Om mamatos kou nopo do mikuwo'd sumpa' om mositi' no dot id suang no do ngaran dau.

Ilo' piya tawan dit asawat kopio nga' TUHAN i' o sanganu. Om iti tana', om koinsanai di hiti nga' iyau nogi' o sanganu.

Iyo nopoddi om pointalango' no dokoyu o kosianan dokoyu dot id tulun do sompogunan diri tu' iyokoyu nga' sompogunan i' do hilo'd Masir di gulu po.