Popular Bible Verses from 1 KORINTUS 13

Share

Tulun nopo dit osianan om alanut i' o ginawo om osonong koulun. A' i' iyau mosol, om a' mingudut, om a' minggayo-gayo. A' i' iyau mokirayou-rayou, om a' ohurolo, om a' mononsog do tulun do suwai do tumanud do dau'd korohian, om a' obingkaus om a' obinsuli'.

Alanut i' o ginawo dau do tumimbaba' do nunu nopo, om monongkuyaan iyau; om amu' tumingkod do mogondos, om alanut o ginawo.

Tulun nopo dit osianan om a' i' orohian dit araat, tu' korohian nopo dau om iri no it osonong.

Nga' daamot nopodti om haro o tolu o kowoyoon dit apatut do wonsoyon kasai' toko': otumbayaan, mogondos om mogiinsian-sian. Nga' iri nopo it agayo kopio dot id pogialatan di tolu'ddi, om it osianan do tulun do suwai.

Kosianan nopo om aiso' i' o kopupuson. Dinondo nopodti om haro i' o tulun dit oilo do popolombus di habar do mantad id Kinorohingan, nga' tumingkod indo iyau do popolombus di habar diri. Dinondo nopodti om haro i' ot oilo do mimboros do mogisuayan o bansa'd boros di koimayaan, nga' koimbagu nopondo om kotingkod i' iyau do mimboros do boros diri. Dinondo nopodti om haro i' o tulun dit ogumu' o toilaan, nga' koimbagu nopondo om olihuan indo i noilaan diyolo'ddi.

Mulong piya do milo oku'd mimboros do mogisuayan o bansa'd boros do tulun om boros do moloikat, nga' ondung a' oku osianan, om iri nopo boros ku'ddi om kohiyo-hiyo no toomod, om aiso' i' o komoyon.

Mulong piya dot oilo oku do popolombus di habar do mantad id Kinorohingan, om kosuhut ngai' oku dit angaralom, om kongoilo ngai' oku do nunu nopo, om otumbayaan kopio oku'd Kinorohingan, gisom do milo oku do popoundaliu do nuluhon, nga' ondung a' oku osianan, om aiso' i' o guna-guna' ku!

Mulong piya dot insanan ku nopod popuhawang dot id tulun do mosikin o nunu nopo i haro dot id doho', om patahakon ku o tinan ku do maan sorobo', nga' ondung a' oku osianan, om aiso' ngai' i' o guna-guna'ddi.

Tontok nopo di tanak oku po, om don tangaanak no do koboro-boroso' ku, om don tangaanak do pomurimon-rimon ku, om don tangaanak do kowoyo-woyoo' ku do momusorou. Dinondo nopoddi tu' agayo oku, om notingkadan ku no i kowoyo-woyoo' ku di don tangaanak.