Popular Bible Verses from Rome 14

Share

Laban Perintah Allah Taala ukai pasal pemakai enggau utai ti diirup, tang pasal pengelurus, pemaik enggau pengaga dalam Roh Kudus. Orang ke bekereja ke Kristus baka nya dikerinduka Allah Taala, sereta dikerinduka mensia.

Enti kitai idup, kitai idup ke Tuhan, lalu enti kitai mati, kitai mati ke Tuhan. Nya alai, nemuka kitai idup tauka mati, kitai endang enggi Tuhan.

Nya alai, aram kitai ngereja utai ti mai pemaik, enggau utai ti tau ngeringka pangan diri.

Nya alai, aram kitai badu agi ngakim pangan diri, tang mutus ati enggai sekali-kali ngereja utai ti tau ngasuh orang bukai tesangkut tauka bedosa.

Laban endang udah ditulis, “Laban Aku endang idup, ku Tuhan bejaku, genap iku orang deka besugang di mua Aku, lalu genap iku orang deka muji Allah Taala.” Nya alai, genap iku kitai deka madahka pasal diri empu ngagai Allah Taala.

Sambut orang ke lemi pengarap, tang ukai laban kita deka bekelikuhka pasal runding sida.

Sapa kita nya, alai kita berani ngakim ulun orang bukai? Tuan sida empu ke deka mutuska penemu sekalika orang nya rebah tauka bediri. Lalu iya deka bediri, laban Tuhan ulih ngasuh iya bediri.