Popular Bible Verses from Mikah 4

Share

Genap bengkah bansa deka nyembah sereta ngasika petara sida empu, tang kitai deka nyembah sereta ngasika TUHAN Allah Taala kitai belama lama iya.

lalu bala orang ari semua bansa deka nyebut, “Aram kitai niki ngagai bukit TUHAN, ngagai Rumah Sembiang Allah Taala ke disembah orang Israel. Iya deka ngajar kitai utai ti diasuh Iya kereja kitai. Kitai deka bejalai nengah jalai ti udah dipilih Iya. Laban ajar TUHAN deka datai ari Jerusalem. Iya bejaku ngagai bala nembiak Iya ari Sion.”

Jemah ila bukit ti alai Rumah Sembiang bediri deka nyadi bukit ti pemadu tinggi, ti ngayung semua bukit. Mayuh bengkah bansa deka beterudus datai ngagai iya

Iya deka ngatur laya entara semua bansa, entara menua ti bekuasa, ti semak enggau ti jauh. Sida deka nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu. Semua bansa enda agi beperang, lalu nadai agi nyendiaka diri beperang.