Popular Bible Verses from Isaiah 60

Share

Angkat, Jerusalem, lalu manchar baka mata hari. Mulia TUHAN manchar ngagai nuan!

Semua bansa deka datai ngagai penampak nuan, lalu bala raja deka datai ngagai penampak hari nuan ti baru.

Semua bansa bukai deka dibap pemetang, Tang penampak TUHAN deka manchar ngagai nuan. Penampak mulia Iya deka meruan enggau nuan.

Indah suku raban bansa ti pemadu mit, ti pemadu baruh pendiau Deh deka besai kuasa, baka bansa ti besai kuasa. Lebuh maya ti ngena datai, Aku deka ngasuh utai tu lengkas nyadi. Aku tu TUHAN!”

“Nuan enda agi begunaka penampak mata hari lebuh siang hari Tauka penampak bulan lebuh malam hari, Laban Aku ti TUHAN deka nyadika penampak nuan belama iya. Penampak mulia Aku deka manchar ngagai nuan.

Nuan enda agi tusah ati Laban Aku ti TUHAN deka nyadika penampak nuan belama iya, Ti tan lama agi ari mata hari enggau bulan.

Nuan deka meda nya, lalu ati nuan deka penuh laban pengaga. Nuan deka getar-getar gagit ati. Pengaya semua bansa deka dibai ngagai nuan. Pengaya sida deka datai ari tasik luar.

Perening ngagai utai ti ngelingi nuan, lalu peda utai ti nyadi: Bala nembiak nuan begempuru laban sida deka pulai baru ngagai menua sida empu! Bala anak lelaki nuan deka datai ari menua ti jauh. Bala anak indu nuan deka dibai baka ke mai anak mit.

Semua bala nembiak nuan deka ngereja utai ti ngena, Lalu deka bempu menua tu belama iya. Aku udah nanam sida, Aku udah ngaga sida, Kena mandangka pemesai kuasa Aku ngagai semua mensia.

Orang ke bamuk nadai agi didinga. Pengerusak nadai agi ngerusak menua nuan. Aku deka ngelindung sereta nyaga nuan baka dinding kuta. Nuan deka muji Aku, laban Aku udah nyelamatka nuan.

Pintu kuta nuan deka tebuka siang malam, Ngambika raja ari mayuh bengkah bansa Mai pengaya sida ngagai nuan.

Rintai bala unta deka datai ari Midian enggau ari Epah. Sida deka datai ari Sheba, mai emas enggau menyan. Orang mayuh deka madahka berita ti manah pasal utai ti udah dikereja TUHAN!

Ku TUHAN bejaku ngagai Jerusalem, “Orang bansa bukai deka nirika dinding kuta nuan baru, Lalu bala raja sida deka betuaika nuan. Lebuh Aku ringat suba, Aku ngukum nuan, Tang diatu Aku deka ngayanka pengerindu enggau pengasih Aku ke nuan.

“Nuan enda agi ditinggal lalu dipegedika, Nengeri ti ditinggalka sereta nadai orang nguan. Aku deka ngaga nuan besai sereta manah gaya, Nyadika endur alai pengaga deka meruan belama lama iya.

Semua bansa enggau raja deka ngintu nuan Baka indai ke nusuka anak diri. Nuan deka nemu, Aku ti TUHAN udah nebus nuan, nemu Allah Taala ke disembah orang Israel ti bekuasa udah nebus nuan.