Rugunda tsunuꞌa jiꞌi: Are utsunchiaon nchaꞌon ixin Jesucristo tsii inaa, anto tsjé thi tangi sikuꞌen. Ixin sinthe chujni thjee thi jeꞌo rinao ko anto tsakuꞌen tumi, ko anto tsaꞌin ñao, ko tsunuꞌe na̱ ixin anto renthe na̱. Ko runichja na̱ jianꞌa ixin Ndo Dio, ko dithikaonꞌa na̱ ndudee na̱ ko janee na̱, ko xra runingakuꞌen na̱ chujni ncheꞌe jian ngain na̱, ko tjanuanka na̱ juajnee Ndo Dio. Ko anto jianꞌa na̱, ko ndusenꞌa na̱ thi tuꞌen chujni, runichja na̱ thi nduaꞌa ixin inaa chujni, ko suñaunka na̱ ko runichjakua na̱ ko anto jianꞌa na̱ ko ningakueꞌen na̱ kain thi jian. Ko rundachro na̱ ixin jian chrjiꞌo ná aro jeꞌo sinthayaꞌa na̱, ko tsusueꞌa na̱ ncheꞌe na̱ thi jianꞌa rinao na̱, ko anto tsaꞌin ñao na̱ ko icha sinchexruxiꞌin na̱ thi jianꞌa ko iruxraxaonꞌa na̱ ixin Ndo Dio. Ko sincheꞌe na̱ ixin xraa anto dithikaon na̱ Ndo Dio, aro thi jianꞌa ncheꞌe na̱ tsjangi ixin jeꞌa ndua thi ncheꞌe na̱.
Ko jaꞌa tatoꞌa chujni jañaa ncheꞌe.