Popular Bible Verses from Romanos 1

Share

Xnipinaua tej, para nikteijlis on kuajli tlajtojli yejuan kiteijlia ken Dios temakixtia, pampa on yejua ipoder Dios para kinmaka temakixtilistli nochimej on yejuan kineltokaj. On temakixtilistli achtoj opeu kipiyaj on hebreos*, pero aman no peua intech on yejuan xhebreos*.

In kuajli tlajtojli yejuan kiteijlia ken Dios temakixtia techmachistia kenijki Dios kimaka sen tlakatl yolmelaualistli. Dios kimaka yolmelaualistli san ipampa itlaneltok niman xitlaj* okse ipampa ijkin ken kijtoua in Yektlajkuilojli: “On tlakatl yejuan yolmelajki san itechkopa itlaneltok nemis.”

Desde ijkuak opeu in tlaltikpaktli, nochi tlakatl ueli kita in tlaltikpaktli, on cielo niman nochi on tlen Dios okichijchiu. Itechkopa nochi on tlajtlamach*, yejuamej ueli kimatij ika Dios kipiya poder yejuan xkaman tlamis niman de on inemilis. Yejua ika tej, ijkuak kintlajtlakolmakaskej, xueliskej itlaj ika tenankiliskej yejuan kimpaleuis para nomanauiskej.

Maski yejuamej okimatkej ika Dios nemi, xokitlakaitakej ken Dios nion xokimakakej tlaxtlauijli. Pero intlamachilis yej xok ueli kinemilia on tlen uelis kinpaleuis, niman inyoltechikaualis hasta xok ueli itlaj kuajli kajsikamatij.

Yejuamej okipatlakej on tlen melauak de Dios ika on tlen tlakajkayaualistli. Yejuamej kitlakaitaj niman kimauistiliaj on tlen Dios okichijchiu, pero xkitlakaitaj niman xkimauistiliaj Dios akin kitocaroua kiselis yekteneualistli para nochipa. Ma ijki nochiua.

Tikitaj tej, ika itlauel Dios, desde ne iluikak ualeua para kincastigaroua on yejuan xkuajkualtin niman xyolmelajkej tlakamej yejuan ika intlajtlakoluan xkitekauiliaj ma kimatikan on tlen melauak.

Yejua ika, Dios okinkauilij ma kichiuakan on xkuajli tlajtlamach* yejuan inxkuajlieleuilis okinek. Niman inejeleuis sanoyej tepinajtij. On siuamej hasta notekaj inuan insiuaxiuan, ijkon ken xkitocaroua kichiuaskej. On tlakamej no ijki yej intlakaxiuan kinejeleuiyaj hasta kampa xok ueli. Yejuamej tej, kichiuaj tlamach tlen tepinajtij, niman pampa ijkon nonejnekij, aman tlajyouiya intlalnakayo pampa kiselia on castigo yejuan kitocaroua kiselis. Pampa xok kinekij kimatiskej tlajtlamach* de Dios, Dios okinkau okinemilijkej on tlen sanenkaj. Yejua ika, yejuamej kichiuaj on tlen xkitocaroua kichiuaskej.

Maski noteneuaj tlamatkej*, yejuamej onochijkej tontos. Yejuamej okikajkej iueyilis Dios yejuan xkaman miki, yej kinmauistiliaj on yejuan tlamachijchiualtin ídolos yejuan tlajtlachaj ken tlakamej yejuan mikij, noso ken totomej, kouamej* niman on yolkej yejuan kipiyaj naui inmikxi.