Popular Bible Verses from Aibraniyi 11

Share

Kni yi nu zhin gaiciya ga? Gaiciya ga kwo nu zhin bugba shi ge nya yi ye kwo ɓa zhin. Ko nu zhin gaiciya ga n bugba ge nya lo na bye kwo da shike yi ta mi ya to kwo bwa m, kwo kwa ya gye m. N sapai aza ɓei nyi n gaiciya ga yi sosai. Aɓei zhin a kpe ɓa ye ntu ɓa gaiciya ga ɓo.

Shekwoyi ta wo ho agmada m ndei ho to n gaiciya ga yi m. Oza n wo ye wa ɓe wa ba dole wa ga wo gaiciya. Wa kpe ge Shekwoyi zhin wa ga aza lada n ɓa zan wo shin nyi.

Dna gaiciya ga, yi kpe lo ge Shekwoyi nu ɓei zhin anyi n nanyai vinya n ɓa fi n ɓa nyi. Owo ɓeda nu ɓei zhin ɓa, nsasayi kwa zhin.

Ibrahim kwa wo ɓei kpema Shekwoyi sosai. Dna n gaiciya ga wa wo Shekwoyi begye. Shekwoyi ɓo gna wo ge wo fa wa yi wa lo ekni do. Shekwoyi ɓo ku gna ge wo ɓa ga Ibrahim ekni yi. Wo ɓolo, to woi kpe aba n wo lo m. Wo ɓei zhin zhiɓeyi nu dna ekni alkawali nya. Ama wo ɓei la kpema Shekwoyi. Wo ɓei dna n na lubui n wo puwa yi vinya Ishaku ɓedo n Yakubu yi ɓa ɓo fi n na lubui ce. Shekwoyi ɓei ga ɓa alkawali ngye Ibrahim.

Nuhu ɓei zhin ʼzanu n wo ɓei kpema Shekwoyi. Shekwoyi ɓo wu wo anya n ɓa ɓa zhin. Nuhu ɓei la gaiciya ga Shekwoyi wa zhin eya ntu ge kwa gni wo puwa. Aza je ɓei gyi abye ɓa zhin laifi. Ɓa to ɓo ga Shekwoyi gaiciya m. To ɓa viwo begye m, Shekwoyi ɓo gwo Nuhu ntu wo gaiciya ga ɓo, n wo ɓo vi yi.

Enoch ɓei zhin zanu n gaiciya gayi. Wo ɓei la kpema Shekwoyi. Shekwoyi kwa wa dagma n wo gaiciya gai. Ntu cenu wo to ɓo fi m. Shekwoyi ɓei la wo la lo n cei n ʼshemi.

Gaiciya ga nu ɓei zhin Habila wa vi Shekwoyi ɓo. Wo ɓei ɓe n nyagayi n kwo ɓei da Shekwoyi ndu Kayinu nya. Shekwoyi ɓei la Habila gwo ɓedo n wo nyaga yi. Habila gwo ɓedo n wo nyaga yi. Habila lafi amma dole ya dna wo wye ya gye wo ɓei kpe ma Shekwoyi.

Saratu ɓei n gaiciya ga yi, Owo gaiciya ga ɓo zhin wo wa ma oɓi woi la kwo. Wa gaiciya ga ge Shekwoyi ɓa nuwo alkawali.

Ibrahim ɓei pmi Shekwoyi wa ɓe n woyi n zhimi. Ezhi n Shekwoyi wa mi n wohin yi.

Musa wohin ɓei gaiciya ga. Wa mwa har wa zhin zayakwo dna Masar, to wa ye ayi wo ge Firʼauna nyigun nugun m. Wa ye wa sun wahala n Shekwoyi azayi, wo to ɓei ye wa dagma dna n laifi m. Wo ɓei gna wo ta ye wa zhin aɓo n gye a Masar yi aɓin, ama wo ɓo gye kwo ɓa wo du wa sun wahala ntu Shekwoyi alkawali ɓo, Wo ɓei la gaiciya ga ge Shekwoyi ɓaga wo lada n du Masar nya. Dna gaiciya ga wa fa Masar, wo to ɓei wo dna ge esu ɓa gyi minagyi m, wo ɓei kpe ge Shekwoyi kunsun lo n woi, Wa kpe ma Shekwoyi iko.

Sanu Shekwoyi ɓeitu Ibrahim mwi cei nyi wo ɓo dudu wa kpema wo. Ntu cenu wa ga Ishaku owo ɓi. Har wa ku shiri zhin wa zun wo sha ntu sadaka ɓo.

Rahab ɓei zhin karuwanu. Ama wo ɓei la gaiciya ga Shekwoyi iko, wo to ɓei fi n kunsun nwo azaje yi m, ɓa ɓei fi ntu ge ɓa to ɓei vi Shekwoyi begye m. Amma Rahab ɓei la azhi-pmigye yi gwo.

A Israila yi ɓei la kpema Shekwoyi. Ɓa pi ola dnagmayi ya n gye ɓa piya n kni kawai. Ama sanu na Amasar yi ɓei tumwi ge ɓa lo, ɓa ku bwi nuwan.

Dna n gaiciya ga Jerikwo galu kwa ʼɓaya, A Israila yi ɓei she galu gun anyipyei tnaba. Shekwoyi gbega nu ɓei. Ɓavi gbega yi kwa.

Wo ɓei ku kpe ge Shekwoyi ɓa gni wo aza, ntu cenu wa gna aza ge ɓa wu kugya ɓa pmiya kwo ami n na bokunmi she, sanu malaika efi nya ɓei duya wo to ɓo wu ɓa ɓi kmisunyi m. Amma puwa doho-dohoi nkwo to ɓei ami yi kpem, wa wu aɓi kmisunyi.

Yusufu ɓei n gaiciya gayi, wo ɓo fi woi la kwo ce. Wo ɓei da a Israila gni-gni ɓo n Masar. Wo ɓei ku kpe ge kwo ɓa zhin lo nu. Ntu cenu wa gna ɓa ge ɓa ɓei la wo asunkun ku lo ncei dna n gaiciya ga nu n wo ɓo da ce.

Yakubu ɓei fi woi la kwo, ama kafin wo fi wo ɓei yi Yusufu aɓi vinya wa zhin aduwa kpe ɓa, wa tu ɓa anabarka. Duk dna n gaiciya ga nu n wo ɓo zhin aɓo ye.

Dna n gaiciya ga Ishaku ɓei tu Yakubu anabarka ɓedo n Isuwa yi ntu na bye ɓo.