Popular Bible Verses from Rom 14

Share

E lele nene tesum̃a tepisayu visena la na lepas nene nap̃a sape yoko tekilia tomun ya pona takan ya, pona monar tevalia namunena ya pona kinanena ya, ana monar ve sineta p̃esan re tesape nanene naga pe sur keviu re tai nene poli loyum̃a e nasup̃enena kiena ne Ntewa. Ana kana pupia sur ne lala, nane nap̃a ita tekila p̃elaga wo na malena mesmesu, a tese sum̃are temio yar tap̃ena lala, a tetol kekarena nap̃a Ninuna Wa sum̃a mlavia. A pogos nap̃a tela sur la nene ve keviu e kieta sitomena, tekila ke yum̃aena wo nap̃a Kristo sinenania, ana yoko Ntewa kekaran ita vap̃isi vanonia, a yoko yar tap̃ena lala avisu sane po pap̃isi.

Pe sa re nene poli, komin visae temali, temali nap̃a tevisirlua kia kiena Sup̃e, a visae temare, temaren nap̃a tevisirlua kiena kia. Sanene, sur make nap̃a tekila, monar tekila amio sitomena nap̃a sane pe tekila re ga kieta nasinenanena poli, ana ita tepe kiena ne Ntewa, monar tetaveve ga kiena nasinenanena.

Sanene, silaga ita make ga monar tom̃areran li nap̃a tekila p̃elaga wo nap̃a kilia ligan sum̃are sike e ita li nalelagaena lala, a nap̃a aiila ita make ga kieta sitomena la imi marua nena napo.

Taveve sitomena la nene, ve tevisuveve manene ita re sina ga, tevisayu ya nap̃a yar tap̃ena kila, tesape po pona piowa ga. Ana ya nap̃a ita li nalelagaena lala monar tesitomia vena tekila sina van ita, naga sanini, sane monar ve tekila re sur tai nap̃a kilia kila nalelagaena kila pal mrapa pona kilia kila naga loru e mlamulena viowa.

Sur nene sike e Nasiriena Wa la rui, nap̃a Ntewa pisi, pisape “In na nemal na nesike ne, ana nekilia nevisa ruru sane pogos na pimi ke ne nap̃a yoko yar make ga akinai vamon inu, a yoko yar make ga avisawal avisave in ga taaga nepe Ntewa.” Sanene, yoko ita make ga teim e marana Ntewa, a yoko monar ita make ga veve taaga tevisawal sur la nap̃a tesum̃a tekila, a naga ke narui yoko visuvevea.

Erau lala, sineun nesape akilia sa nap̃a nemloge rui sane pupia visena tai sike e amiu nagane. Sane lap̃asa, kiela sitomena mok liu e sur lap̃asa, asape popon akila, pona viowa ga nap̃a akila, pona amaraun asape visae akila, sa p̃is Ntewa ve kekaran la re sina. Sineun nesape la ne sanene, nepisu sane la pe apiawa re m̃arera poli wa, ana pogos nap̃a asike amio ita, ve tekilali re nap̃a takawe manene laa, tekekaran nap̃a toure la.

Li nalelagaena make ga asum̃a apisu ke ga Ntewa asape naga pe kiela sup̃e, ana naga ga kilia visa van la visave la veve taaga akila nene pona ve akila re nene. A sanene, pe pon re ita ga telip̃ere ita si poli. A Ntewa pisu yeririna lap̃asa akan tata, a lap̃asa pe akan re tata poli, ana naga kekaran la make ga, komin naga kilia nap̃a sape yoko Sup̃e Yesu kilia sum̃a iila la silaga vena asum̃a asum̃al m̃arera e naga.