Popular Bible Verses from Malakayi 3

Share

Unu tụko ụzo-lanụ-l'ụzo-iri unu g'ọ ha wobata l'ụlo, l'aakwakọbeje ẹku mu nke ọwhu nri l'a-dụ l'eze-ụlo mụbe Chileke. Unu mee ya nno gude dalee mu, unu awhụ lẹ mu l'a-gụharu unu ụzo l'imigwe wụaru unu iwhe-ọma, wụa ya nke etsutsu iya. O noo iwhe Onye-Nwe-Ọha bụ Onye-ishi-igwe-ọgu l'ekfu ndono.

Mu l'a-dachi ụnwehu tẹ whẹ ba atapyashịshi iwhe unu kọberu l'alị, mu emee tẹ mebyi vayịnu unu ba anọ erishihu l'okurutu. O noo iwhe Onye-Nwe-Ọha bụ Onye-ishi-igwe-ọgu l'ekfu ndono. Nteke ono bẹ mba nọnu l'e-ku unu ndu Chileke gọru ọnu-ọma nụ nkele alị unu l'a-nọ atsọ ụtso ebubu.” O noo iwhe Onye-Nwe-Ọha bụ Onye-ishi-igwe-ọgu l'ekfu ndono.

Onye-Nwe-Ọha, bụ Onye-ishi-igwe-ọgu l'ekfu sụ: “Whẹ l'a-bụru ndu nkemu. Mbọku mu l'a-bya ọgba-zhi ẹku mu bẹ mu l'a-gụkwaru whẹ ye lẹ ndu bụ nkemu. Mu l'e-meru whẹ obu-imiko ẹgube ono, nna l'emejeru nwa, kweru nkiya. Nteke ono bẹ unu l'a-whụ ọdu iche dụ lẹ ndu dụ chịriri mẹe lẹ ndu l'eme ejo-ememe. Unu awhụkwawho ọdu iche dụ lẹ ndu l'ejeru Chileke ozhi yẹle ndu l'ete ejeru Chileke ozhi.

Onye-Nwe-Ọha, bụ Onye-ishi-igwe-ọgu bẹ l'ekfu sụ: “Unu lekwa, mu l'e-zhi onye ozhi mu t'o vuru mu ụzo je emechaaru mu ụzo. O noo nteke bụ ejia ekfu, Onye-Nwe-Ọha ono, unu shi leta ẹnya iya ono abụru whẹrekete l'eze-ụlo iya. Onye ozhi ono, ẹnya dụ unu t'unu whụa l'a-bya aryaa nke ọgbandzu mu aryarya. Leenu, ọobyakwaa.”