Popular Bible Verses from KADA OMBO’ LAKO RASULU’ YOHANES 12

Share

Natalomo tau iato mai tu naga tete dio rara Anak domba sia tete dio kada nakatottongi; sia tau iato mai tae’ nadampang sunga’na moi sae lako matena.

Kurangi pole’omi misa’ gamara kapua dao suruga, ma’kada: Totemo nalambi’mo tu kamakarimmanan sia kamatotoran sia kadatuanna Kapenombanta, sia kuasanNa To Natokko, belanna tipembuangmo rokko tu to umpangrosoan mintu’ siulu’ta, tu umpangrosoanni dio oloNa Kapenombanta allo bongi.

Dipembuangammi tu naga kapua, iamo ula’ tua, tu disanga deata patua’ ba’tang sia deata masussuk, tu umpapusa mintu’ issinna lino. Dipembuangammo tama lino sia mintu’ baananna dipembuangan dukamo sola.

Iamoto, parannu-rannukomi, e lili’na suruga, sia mintu’komi tu lanna. Mandasa dikka’ tu lino sia tasik, belanna mengkalaomo mati’ tu deata bulituk situang sengke budanna, apa naissan kumua madenge’mo attunna.

Bu’tumi kasirarian dao suruga, iamotu Mikhael sola mintu’ malaeka’na urrarii naga; na iatu naga sola mintu’ baananna parari dukami

Kendekmi kasengkeanna tu naga lako baine iato, namale urrarii tu bati’na baine tu torronapa, iamotu mintu’ to ungkaritutui parentaNa Puang Matua sia untoe manda’i tu Napamanassanni Yesu.

Kaananmi dao langi’ misa’ tanda kapua, iamotu misa’ baine disapu’ allo anna diong to’ lette’na tu bulan, sia ulunna ma’makota bintoen sangpulo dua. Iatu baine iato ma’tambuk anna sumarro, belanna mapa’di’ sia mangurria’ la kianak.

Undadiammi misa’ pia muane, tu dadi muane, la umparentai tekken bassi mintu’ to kapere’; ta’pa disintakmi tu Anakna nadibaa lako Puang Matua sia lako to’ isungan kapayunganNa. Mallaimi tu baine iato lako padang aak; inde to, den misa’ inan Naparandananni Puang Matua, kumua anna didaranai inde to dio sangsa’bu duaratu’ annan pulona allona.

Kaanan pole’omi misa’ tanda senga’ dao langi’, iamotu misa’ naga kapua dukku mararang, pitu ulunna sia sangpulo tandukna, sia pitu makota dao ulunna; iatu ikko’na urriu’ sangtaa tallunna mintu’ bintoen dao langi’, anna pentibeanni tama lino. Bendanmi tu naga iato dio tingayona tu baine marassan mangurria’, kumua ianna kianakmo la naamma’ tu Anakna.

Dibenmi baine iato tu da’dua pani’ langkan maega kapua, kumua anna kullei mettia’ lako padang aak, lako to’ inanna, tu inan dinii undaranai lan misa’ attu sia lan dua attu sia lan sangsese attu, mambela dio mai pakitanna ula’. Iatu ula’ iato umpemburrusan uai butung to salu lan mai sadangna dio mai boko’na tu baine iato, kumua anna tallananni. Apa natundui lino tu baine iato napopengangai tu sadangna, anna amma’i tu uai salu napemburrusan naga lan mai sadangna.