Popular Bible Verses from PHILIPPIK 2

Share

Amoyai kiy age tugul eng' toiyet, anan eng' kalasunetapkei, ago eng' kaming'inetapkei ne po naet, koiti chii age tugul chiito age kole kaigai kosiir ineendet; amat kogeer chii age tugul eng' okweek tuguukyik kityo, ago chii age tugul eng' okweek kogeer tuguugap piik alak ak icheek.

Ingotebenok ateboni, ne ki mi agine eng' Kristo Jeso

ne, nganda ki tinyei itoondap Kamuktaindet, koma iit kole kiit ne po kamanuut ne oo kole kogergeit ak Kamuktaindet, ago kiyaigei ineendet koek puch ak konam itoondap otwogindet, kogergeit ak piik; ak kingo took eng' itoondap chii, koming'ingei, kogas iit agoi meet, ee, meet ne po kimurtoiyot.

amu Kamuktaindet ne poisyei eng' okweek si omach, ak oboisyee agine, agobo magennyi ne myee.

Nooto anyun, kiitoroor `Kamuktaindet ineendet miising', ak kogoochi ineendet kainet ne siirei kainet age tugul; si kobiit kogutuny kutundo age tugul eng' kainetap Jeso, age tugul ne mi kipsengwet, ak ne mi ng'wony ak ne mi ng'wony oriit, si kong'aany ng'elyepta age tugul kole Jeso Kristo ko Kiptaiyat, agoi toroornatetap Kamuktaindet Kwanda.

Oyai tuguuk tugul ama eng' kang'unyng'unyosyek ak tiiyasyek; si kobiit oegu che ma tinyei leluut ak ko libwoben, lagogap Kamuktaindet che ma tinyei kunenden eng' kwenutap ibinda ne kunuur ak ko mastaat, che kooluu eng' kwenunnywa ko uu lapkeiyosyek eng' ng'wony

Nooto anyun, chamanikyuk, ko uu ye koogase iit kotugul, ma ye ami kityo, ago nguno ye ma mi ogase iit kosiir, oboisyee yetuneng'wong' kosulda eng' kaiyweisyet ak potanet