Popular Bible Verses from 1 Kirinti 13

Share

Wet maep koropŋo eŋe ŋei peyamine, so pesekine geyake, ŋei wet maep koropŋo ŋei mane wane okora okora me met met me urata mama me don rara me aboŋ kine kineinane bailalaŋ mi okaniyake. Ŋei mane wet maep koropŋo eŋine solaine mi mawalak kayake, eŋinane detki wawaine mi okaniyake, eya midakaka, eŋe ŋei korop kima okanoniyake. Ŋei wet maep koropŋo kine kine qaza zaŋka mi okaniyake, so bonep mi okaniyake. Eŋe sot osi osi ikopka mi okaniyake. Wet maep koropŋo masi qotkoine okankau turuŋine mi dapore mageyake.

Wet maep koropŋo umat kine kine korop tewekwareyake, yeye kine kine korop detluke dere worik mane mi desiyake, wetineŋo korop lukka tebaka geyake, umat kine kine wakongi togogoleka ma okorayake.

Ŋei wet maep korop eŋe borikineŋo suwa ariki qom borik desiyake, okane mama bileŋo suwa ariki wet pesek desiyake.

Kine kine karewe iwa edo papa togon paikei: Mali malip, ora tebaka tebaka, so wet maep. Ŋo iwa eŋano ŋine wet maepŋo yemo suwaine okanmaike.

Wet maep yemo qoiqoine midaine, papa togon. Kaisale wane don rara wane urata yemo baŋ mida lele ariyake, don kuneŋine kait qotot rara wane bakom pamaike, eya baŋ midayake, dereret mama wane urata yewa baŋ mida lele ariyake.

Na kepe ŋei ŋerep eŋane don so aŋelo eŋane don maine rawerap, paki na wet maep midaine gekaleo, yemo naŋane donneŋo wagom mane kitou arokmaike, ukatne, me romon mane wane aroine yale don sawaŋ okangirap.

Na propet ge more don sane korop detluke more kine kine ŋado wakoniyakane done rawerap, paki na Kaisale wane don sane eya wane kine maine det warewerap, so kisi maep wane kine pokaine, me tutuine, eya maine dere detluke detperap, so na rawe bonagaŋo okora okoraine qelige masikaniyakane mali malip maine pa ningirap, paki wet maep midaine gekaleo yemo na ŋei sinoine lelewerap.

Na maine kine kinene korop ŋei aboŋene midaine matoke ebon warewerap, so nae solane Kristo wane ra more sunkawe gerepko zekirap, ŋo na wet maepne midaineŋo yale okangaleo, na wele mi marat kaikale.

Na eya wane kine ra qelaŋanmaile, na medep nigatne gekole yewao medep don ra gekole. Na medep wet wetke gekole, so na medep dereret dere gekole. Eyaŋo ge mage ŋei suwaine okanbe paki medep tanik manik eya korop qeliŋ warekole.