Popular Bible Verses from Éxodo 15

Share

Te jiñaꞌa ya: ―Nuu ja vi konini guaꞌa ron tnoꞌo kaꞌan rin ja kuu rin Jitoꞌo Dios ron, te vi saꞌa ndaa ron nuu rin, te vi kuantnoꞌo ron tnoꞌo ja tatnuni rin, te vi tavaꞌa ron ndiꞌi nagua kaꞌan nuu ley rin, te ma tetniuu rin siki ron ni in nuu kueꞌe ja ni tetniuu rin Egipto, chi maa rin kuu Jitoꞌo, ia ndasaꞌa ña jin ron ―jiñaꞌa ya.

Jitoꞌo kuu ia taa jandakui san vi yaa jita san. Maa ya kuu ia ni skaku niꞌnu ña jin san. Maa ya kuu ia Dios san, te chiñuꞌu san ya. Te suu ya kuu ia Dios tata san, te saꞌa kaꞌnu san ya.

Tu na inka ia na kuinio maa ni, vi Jitoꞌo, neꞌu chuꞌchi. Te ni tu na in ia ii vi ia kaꞌnu na kuinio maa ni. Chi saꞌa ni tniuu ja ioo ndevaꞌa kaa, vi tniuu ja luu ndevaꞌa kaa.

Te jin jandaꞌu ini ni ndeka ni ñayiu ñuu yaꞌa ja ni skaku niꞌnu ni. Te jin jakaꞌnu ni ndeka ni jin ndee veꞌe ii nuu oo maa ni.

Te nuu ni jinokuei nuu nani Mara, te tu ni kuu ja vi koꞌi ndute ñuꞌu yun, chi ndute ugua kuu de. Yun guaa ni ka xnani Mara. Yun te ni ka jinkondee ñayiu Israel ka kaꞌan kuechi siki Moisés, te ka jiñaꞌi: ―¿Nagua vi koꞌo san? Yun te ni kana jaa Moisés nuu Jitoꞌo, te ni xneꞌe Jitoꞌo in yutnu, te ni kiꞌin Moisés yutnu yun, te ni tnaa de tnu nuu ndute ugua yun, te ni nduu vixin de. Te yun ni jito tnuni ña ya, vi yun ni jiñaꞌa ya in ley ya vi ni tatnuni ya ja vi kakai nuu ya.