Popular Bible Verses from Roma 8

Share

Hatematak ia ita bubuluk ena talo ia: Manetualain tao nala basa hata dadi neulauk soa-neu hatahori fo mana sue-lai neun. Numa lele uluk mai Manetualain koladu memak ena, laꞌe-neu Ana nae tao talo bee soa-neu sara. De Ana nanggou sara ena nae, “Mai, leo! Mai dadi miu Au hatahoring!”

Au bubuluk no tetuk talo ia: ta hambu hata esa boe na fo bisa tao nala Manetualain hahae sue-lai neu ita. Leo mae ita tasoda do, ita mate do, hambu ata numa nusa tetuk do inggu temak mai do, mana toꞌu parenda do, hambu koasa do, dedeꞌak hatematak ia do, dedeꞌak mana maik do, koasa nai lalai do, koasa nai dae-inak do, hata laen fo Manetualain adu nalak kara ena do — ta hambu esa boe na bisa nabingga-baꞌek ita numa Manetualain mai fo tao nala Ana ta sue-lai ita bali! Huu ita takaesa to ita Lamatuan Yesus Karistus, fo Manetualain nadenun mai ena.

Leo naak oo neu ita tahani taa-taa boe, Manetualain Dula-dalen oo tulu-fali ita boe, nahuu ita barakain taa, ma ta hule-haradoi talela no ndoos. Tehuu Manetualain Dula-dalen ndia hule-haradoi nggati ita, leo mae ita kada tahohoo a, ma ta bisa hule-haradoi pake dedeꞌa deꞌek esa boe na.

Dadi ita tae kokolak hata bali laꞌe-neu dedeꞌak kara raa? Manetualain nasalaꞌe ita. Mete ma talo naa, na, see bisa laban ita bali? Ta hambu, hetu?

Dadi Manetualain ta fee huku-dokik neu hatahori fo mana nakaesa no Yesus Karistus!

Hatahori fo mana fee lelak neu hata fo manggarauk kara fo koladu ndia duduꞌan, sama leo hatahori fo ta mana namanene Manetualain Dula-dalen, de ndia dale kuru-eron soa-neu Manetualain maten ena. Tehuu hatahori fo mana fee lelak fo Manetualain Dula-dalen koladu ndia duduꞌan naa, ana leo-laꞌo no ndoos, ma dalen lino-lendek.

Dadi leo mae ita hambu susa-sonak talo bee oo, tehuu ita senggi ena, nahuu Karistus sue-lai nalan seli neu ita boe.

Tehuu tungga au, doidosok fo ita hambuk hatematak ia sosoa-ndandaan taa, mete ma takasasamak kana no hata fo ta hohoꞌak kara fo neu ko Manetualain natudun neu ita.

Fama te ei duꞌa mae, hambu hatahori do, dedeꞌak do, fo bisa nakasetik Karistus losa Ana ta sue-lai ita bali, do? Ta bisa dadi! Leo mae ita hambu dedeꞌak do, susa-sonak do, doidosok do, ndoe-laꞌas do, bua-loꞌas taa do, hambu sosoek do, hatahori nae nakanisa do, tehuu Karistus sue-lai nakandoo neu ita. Ta hambu hata esa boe na fo bisa tao nala Ana hahae sue-lai neu ita!

Manetualain ndia bubuluk basa hata fo ita tae kokolak nai ita dalen. Ana oo bubuluk Ndia Dula-dalen duduꞌan boe. Huu naa de Ana bubuluk basa hata lalaꞌen fo Ndia Dula-dalen nae kokolak fo tulu-fali neu ita. Manetualain simbo hule-haradoik naa, nahuu Dula-dalek duduꞌan sama leo Manetualain mesa kana duduꞌan. Ndia Dula-dalen hule-haradoi fo Manetualain tulu-fali hatahori kamaherek kara. Dula-dalek naa, hule-haradoi tungga Manetualain hihii-nanaun.

Hatahori fo mana namanene neu Manetualain Dula-dalen fo koladu sara, na, sira iar Manetualain anan nara.

Hatahori fo mana leo-laꞌo tungga kada sira mesa kasa hihii-nanaun naa, ara leo-laꞌo talo naa nahuu ara duduꞌa kada hata fo manggarauk kara a mesan rakandoo. Tehuu hatahori fo mana leo-laꞌo tungga kada Manetualain Dula-dalen hihii-nanaun, ara duduꞌa kada hata fo mana tao namahoko Manetualain Dula-dalen.

Manetualain ta kaꞌi-natabaa Ndia Ana heli-helin. Tehuu Ana loo lima Anan fo mate dadi neu tunu-hotuk, fo tulu-fali ita basa ngga lalaꞌen. Huu Manetualain ta kaꞌi-natabaa Ndia Anan faa boe na, ita bisa bubuluk tae, neu ko Ana oo fee no muda hiek neu ita, basa hata fo neulauk boe. Tebe, hetu?

Ita mesa ngga dalen ndia nafada nae, ita dadi teu Manetualain anan nara. Ma Manetualain Dula-dalen oo nafada nae leo naa boe. Mete ma ita dadi teu Manetualain anan nara, naa sosoa-ndandaan nae, neu ko ita simbo tala Ndia pusakan, nahuu Ana dadi neu ita Aman. Dadi mete ma Amak fee pusaka neu Ndia Anan Karistus, neu ko ita oo simbo sama-sama Ndia pusakan boe. Tehuu hambu dedeꞌak esa bali: ita muste hambu tala doidosok, sama leo Karistus oo hambu doidosok boe, mita fo Manetualain neu ko bisa nakadedemak ita, sama leo Ana nakadedemak Karistus ena.

Ita hatahori dae-bafok hihii-nanau heli-helin laban tebe-tebe Manetualain hihii-nanaun. De ita mesa ngga ta takaluku fo nenene neu Manetualain, nahuu ita mesa ngga ta bisa.

Naa te basa hata fo Manetualain adu nalak kara marai lalai no dae-inak, ara rahani taa-taa ma hii ralan seli fo mete-rita Ana natudu Ndia anan teteben nara raa, sira seer. Ana nae natudu sara no dale mana mbena sau-sauk.

Ita bubuluk ena tae, hambu susa-sonak ma doidosok noꞌuk ka nai dae-bafok ia. Numa fai bakahulun losa hatematak ia, basa hata fo Manetualain adu nalak kara raa rahohoo huu rameda hedis, neu rahani taa-taa fo Manetualain adu basa-basan dadi beuk. Naa, sama leo inak nahohoo huu nameda hedis neu ana nahani nae bonggi anan.