Popular Bible Verses from Yaxayas 53

Share

Twb yog vim peb tej kev txhaum, nws thiaj raug luag nkaug, thiab vim tej kev phem uas peb ua, nws thiaj raug luag ntaus. Nws raug txim txomnyem ntsuav, twb yog pab kom peb tau nyob kajsiab lug, nws raug nplawm, twb yog kho kom peb zoo.

Peb txhua tus zoo li tej yaj uas yuamkev lawm; peb nyias mus nyias ib txojkev. Tiamsis tus TSWV muab peb lub txim uas tsimnyog peb raug tso rau nws ris.

“Tiamsis nws ris peb tej kev txomnyem thiab ris tej kev mob uas twb tsimnyog peb raug. Txawm li ntawd los peb tseem xav tias qhov uas nws raug nplaum thiab raug ntaus ntawd twb yog Vajtswv rautxim rau nws.

Peb saib tsis taus nws thiab tsis quavntsej txog nws; nws raug kev txomnyem thiab nyiaj rawv txoj kev mob. Tsis muaj leejtwg yuav xav tig mus saib nws. Peb tsis quavntsej nws cuag nkaus li nws tsis tsimtxiaj dabtsi.

“Nws raug caijtsuj thiab raug tsimtxom hnyav heev; tiamsis nws txo hwjchim thiab nws tsis qhib ncauj hais ib los li. Nws zoo li tus yaj uas luag cab mus tua, thiab zoo li tus yaj uas luag tabtom muab txiav plaub los nws twb tsis qhib ncauj hais ib los li.

Tus TSWV hais tias, “Kuv yeej pomzoo cia nws raug kev txomnyem, Nws txoj kev tuag yog kev theej txhoj thiab kev zamtxim. Yogli ntawd, nws yuav pom nws cajces; nws yuav muaj sia nyob ntev, thiab nws yuav ua kom Kuv lub homphiaj tiav.

Twb yog tus TSWV pomzoo kom Nws tus tubtxib lojhlob yam li tsob ntoo uas nrhau cag tuaj ntawm thaj av qhuav. Nws lub cev ntajntsug tsis zoonraug uas yuav ua rau peb nyiam nws. Nws tsis muaj ib qho zoo txaus nyiam, uas yuav ua rau peb xav mus ze nws.

Yogli ntawd, Kuv yuav pub koobmeej rau nws, nws yuav tau nrog cov uas ua tus loj thiab muaj hwjchim nyob. Vim nws txaussiab tso nws txojsia thiab los tuag, los nrog cov neeg txhaum raug txim uake. Nws ris sawvdaws lub txim; thiab thov kom tus TSWV zam lawv lub txim.”

Tomqab txoj kev txomnyem dhau lawm, nws yuav rov muaj kev zoosiab; nws yuav paub tias tej uas nws tau ua ntawd yeej tsis nkim nws tus zog li. Kuv tus tubtxib ncajncees uas Kuv txaussiab, yuav ris coob leej ntau tus lub txim, vim saib rau saum nws, Kuv yuav zam lawv lub txim.

Nws raug ntes, raug tsimtxom, thiab raug coj mus tua povtseg, los tsis muaj leejtwg quavntsej nws li. Twb yog vim peb haivneeg lub txim, nws thiaj raug tuag.

Txawm yog nws yeej tsis tau ua ib qhov txhaum, thiab nws lub qhovncauj yeej tsis tau hais ib lolus dag li los lawv ciali muab nws coj mus tso rau hauv lub qhovntxa nrog cov neeg txhaum, thiab faus rau hauv tus txivneej uas npluanuj lub qhovntxa.”