Popular Bible Verses from 2 Kevcai 8

Share

Ncontsoov tias tus TSWV, uas yog nej tus Vajtswv, yog tus pub lub hwjchim rau nej kom nej npluanuj. Nws ua li ntawd, rauqhov niajhnub no los yog Nws yeej tseem ncajncees rau tej lus uas Nws tau cogtseg rau nej cov yawgkoob lawm.

Nws cia nej tshaib, es Nws mamli muab cov manas uas nej thiab nej cov yawgkoob tsis tau noj dua rau nej noj. Nws ua li ntawd twb yog Nws qhia kom nej paub tias neeg tsis yog yuav ciajsia los ntawm zaub-mov xwb, tiamsis yog los ntawm txhua lolus uas tawm hauv tus TSWV lub qhovncauj los.

Ncontsoov qhov uas tus TSWV, uas yog nej tus Vajtswv, tau coj nej kev hla tiaj suabpuam tau plaubcaug lub xyoo, kom nej paub txo hwjchim, thiab sim nej siab seb nej puas yuav ua rawsli Nws tej lus uas Nws tau xaaj tseg.

Yogli ntawd, nej tsis txhob xav tias qhov uas nej muajtxiag npluanuj yog los ntawm nej tus dag tus zog thiab nej lub peevxwm.

“Nej yuavtsum ncontsoov tus TSWV, uas yog nej tus Vajtswv; yuavtsum ua rawsli Nws tej kevcai uas kuv muab cob rau nej hnubno.

Ncontsoov tias tus TSWV, uas yog nej tus Vajtswv, qhuabntuas thiab rautxim rau nej ib yam li tej niam tej txiv qhuabntuas nkawd tej menyuam.

Thaum nej muaj noj muaj haus txaus, nej yuav tau ua tus TSWV, uas yog nej tus Vajtswv tsaug vim Nws muab lub tebchaws uas av zoo heev rau nej.

Yogli ntawd, nej yuavtsum ua rawsli tus TSWV tau xaaj rau nej lawm, hais tias: yuavtsum ua lub neej rawsli Nws tej kevcai thiab hwm Nws.

Nws muab cov manas uas nej cov yawgkoob tsis tau noj dua li rau nej noj nram tiaj suabpuam. Nws tso ntau yam kev txomnyem los sim nej siab, kom thaum kawg Nws thiaj pub yam uas zoo rau nej.

Thaum nej muaj noj muaj haus txaus thiab muaj zoo vaj zoo tsev nyob, thaum nej muaj tej nyuj, tej yaj, tej nyiaj tej kub, thiab ibpuas tsavyam ntau zujzus tuaj, nej yuavtsum tsis txhob khavtheeb es ciali tsis nco tus TSWV, uas yog nej tus Vajtswv, uas tau coj nej tawm hauv tebchaws Iziv los, qhov chaw uas nej ua luag qhev lawm.

“Tus TSWV uas yog nej tus Vajtswv, tabtom coj nej mus nyob hauv lub tebchaws uas av zoo heev; yog lub tebchaws uas muaj havdej thiab muaj qhovdej txhawv, muaj dej cag ntws laublug hauv tej kwjha thiab saum tej roob; yog lub tebchaws uas muaj nplej thiab mog, muaj txivhmab, txiv ncuavpias, txiv ntsiab pobkws, txiv ntoo-roj thiab muaj zib ntab. Nyob rau hauv lub tebchaws ntawd, nej yuav tsis tshaib tsis nqhis thiab tsis tuncua ib yam dabtsi li. Lub tebchaws ntawd tej roob zeb roob tsuas muaj qhov tooj qhov hlau.

“Nej yuavtsum ua tibzoo coj rawsli tej kevcai uas hnubno kuv qhia rau nej txhua nqe, kom nej thiaj muaj sia nyob ntev, muaj tubki coob thiab tau mus nyob hauv lub tebchaws uas tus TSWV tau coglus tseg rau nej cov yawgkoob lawm.

Lub sijhawm plaubcaug xyoo ntawd nej tej tsoostsho yeej tsis ntuag thiab nej tej kotaw yeej tsis o li.

Nws coj nej los hla tiaj suabpuam uas yog lub tiajnrag txaus ntshai heev, uas muaj tej nab muaj taug thiab raubris teb. Thaum nej tseem nyob nram tiaj suabpuam uas qhuav nkig nkuav thiab tsis muaj dej haus, Nws ua rau dej tawm hauv phab pobzeb los rau nej haus.