Popular Bible Verses from Tes Haujlwm 1

Share

Tiamsis thaum Vaj Ntsujplig tus Dawbhuv los rau saum nej lawm, nej yuav tau txais hwjchim, thiab nej yuav ua Kuv li timkhawv nyob rau hauv nroog Yeluxalees, thoobplaws txhua qhov hauv lub xeev Yudas, xeev Xamalis, thiab mus txog qabntuj kawg.”

Yexus teb lawv hais tias, “Tsis tag nej yuav paub txog lub sijhawm thiab lub caij uas Leejtxiv tau teem tseg los ntawm Nws lub hwjchim lawm.

Muaj ib zaug, thaum Nws tseem nrog lawv nyob, Nws hais rau lawv tias, “Nej tsis txhob tawm hauv lub nroog Yeluxalees mus, tiamsis nej yuavtsum nyob tos qhov khoomplig uas Kuv Txiv tau coglus tseg lawm; qhov ntawd Kuv twb qhia rau nej lawm. Yauhas muab nej ua kevcai raus los ntawm dej, tiamsis ob-peb hnub tomntej no, nej yuav tau ua kevcai raus los ntawm Vaj Ntsujplig Tus Dawbhuv.”

Plaubcaug hnub tomqab uas Nws sawv hauv qhovtuag rovqab los, Nws yeej los tshwm rau lawv pom ntau zaug, ua rau lawv paub tias Nws tseem muaj sia nyob. Lawv tau pom Nws thiab Nws nrog lawv tham txog Vajtswv lub Tebchaws.

Tomqab Yexus hais li ntawd tag, thaum lawv tseem ntsiantsoov Nws, ces Vajtswv txawm coj kiag Nws mus rau saum ntuj, thiab muaj ib tauv huab los roos Nws, ua rau lawv tsis pom Nws lawm.

Thaum lawv tseem tabtom ntsiantsoov Yexus mus rau saum ntuj, txawm muaj ob tug txivneej hnav ristsho dawbpaug los sawv kiag ntawm lawv ib sab thiab hais tias, “Cov neeg Kalilais, nej sawv ntawm no ntsia saum ntuj ua dabtsi? Yexus tus uas Vajtswv tau coj tawm ntawm nej mus rau saum ntuj lawm, yeej yuav rovqab los ib yam nkaus li qhov uas nej pom Nws mus rau saum ntuj lawm ntag.”