Popular Bible Verses from Y-Êsai 58

Share

Yêhôwa srăng atăt ih nanao; Ñu srăng bi trei ih hlăm anôk lăn yang hruê hơr, leh anăn Ñu srăng brei klang ih jing ktang. Ih srăng jing msĕ si sa boh war djam arăng krih êa, msĕ si sa akŏ êa amâo thâo khuôt ôh.

Amâo djŏ hĕ snei jing klei kăm ƀơ̆ng huă Kâo ruah leh: kleh hĕ klei săng đai klei wê, ruh hĕ bră kă knông, bi êngiê phung arăng ktư̆ juă, leh anăn bi joh hĕ grăp ƀĕ knông? Amâo djŏ hĕ jing klei bi mbha mnơ̆ng ƀơ̆ng huă ih hŏng pô êpa, leh anăn atăt ba hlăm sang ih phung ƀun ƀin amâo mâo sang ôh; tơdah ih ƀuh pô lưng mlŭn, bi hơô brei gơ̆, leh anăn đăm kui rŏng kơ găp djuê ih pô ôh?

Hlăk anăn klei mngač ih srăng mtrang msĕ si ang dar, leh anăn klei bi hlao ih srăng truh djăl; klei kpă ênô ih srăng nao ti anăp ih, leh anăn klei guh kơang Yêhôwa srăng gak ti tluôn ih.

Hlăk anăn ih srăng iêô, leh anăn Yêhôwa srăng lŏ wĭt lač; ih srăng ur kwưh, leh anăn ñu srăng lač: Nĕ tinei Kâo. Tơdah ih mă hĕ knông mơ̆ng krah ih, wăt klei ktrâo kđiêng leh anăn klei blŭ ƀai

tơdah ih brei mnơ̆ng ƀơ̆ng huă ih pô kơ pô êpa, tơdah ih bi trei mnuih knap mñai, hlăk anăn klei mngač ih srăng ƀlĕ hlăm klei mmăt, leh anăn klei mmăt ih srăng jing msĕ si yang hruê dơ̆ng.

Arăng srăng lŏ mdơ̆ng anôk hđăp ih rai leh, ih srăng lŏ rŭ jih atur hđăp mơ̆ng lu ênuk êgao leh; arăng srăng pia kơ ih phung mkra ƀăng hluh mnư̆, phung lŏ mkra êlan mâo sang arăng dôk.”

“Tơdah ih mdei mă bruă êjai hruê sabat, amâo ngă ôh klei ih čiăng hlăm hruê doh jăk Kâo, leh anăn pia hruê sabat jing klei mơak leh anăn hruê doh jăk Yêhôwa năng arăng mpŭ; leh anăn tơdah ih mpŭ kơ hruê sabat amâo ngă ôh tui si êlan ih pô, amâo duah ôh klei bi mơak kơ ih pô, kăn blŭ klei hơăi mang rei, hlăk anăn, ih srăng mâo klei mơak hlăm Yêhôwa, leh anăn Kâo srăng brei ih đĭ ti anôk dlông hĭn hlăm lăn čar; Kâo srăng čiêm ih hŏng ngăn dưn Y-Yakôp, aê ih,” Ƀăng êgei Yêhôwa blŭ leh klei anăn.

Nĕ anei, diih kăm ƀơ̆ng huă knŏng čiăng bi msao, bi tăng, leh anăn čiăng bi tŭk bi čăm msĕ si phung ƀai. Klei diih kăm ƀơ̆ng huă msĕ si hruê anei arăng amâo srăng hmư̆ ôh asăp diih ti dlông. Djŏ mơ̆ klei kăm ƀơ̆ng huă snei Kâo ruah leh, knŏng pioh sa hruê mnuih bi luă gŭ ñu pô? Djŏ mơ̆ knŏng kkui boh kŏ msĕ si sa ƀĕ mbô leh anăn dôk gŭ ti dlông klŭng leh anăn hbâo? Diih srăng pia klei anăn jing klei kăm ƀơ̆ng huă leh anăn sa hruê bi mơak kơ Yêhôwa mơ̆?