Nataq'en 'auaÿateeta de'eda qom mashi nayiita'a ca loga'tna, nachi nvildeuo caua na'axa'te ÿoqta huo'o da lqalai'c. Cha'ayi da n'onataxac na shiÿaxauapi 'eeta': maichi nauojla't, qataq quetague' da lqopitaxanaqtaic ana plata, qataq ñi'oxonnaxaic, qataq 'otanaxanaxaic. Namayipi sa iyacnapec ñi Dios, qataq sa ÿalaxalguete caua lta'al, qataq 'agaqaic, qataq qaica naq'en ca 'enec da n'amqajnataxanaxac. Namayipi sa dechoxonnataxan, qataq sa nauote' ca lÿa, qataq n'aqtaqa l'o', sa ishit da maichi ntel-la't, qataq yiloxoic, qataq sa ishiteguet na ÿaÿamaqchiguiñi. Namayipi que'elaqtaxanaxaic, qataq saq llivigui lauel, qataq ÿashittagui da ñi'oxonnaxac, qataq ÿagaqainapeguec ca maichi lqochoxo, qaq sa ÿoqochi'iguet ñi Dios. Namayipi nachaxaata da 'eetega quetague' da n'amqajnataxanaxac, qalaxayi sa ishit da hueto'ot da l'añaxac da n'amqajnataxanaxac.
Qaq 'ena qome na 'antela'aguet.